1. Con data do 12 de marzo de 2008 publicouse no Diario Oficial de Galicia a orde desta consellería do día 6 dese mesmo mes, pola que se regula a revisión das tarifas de servizos públicos regulares permanentes de transporte de viaxeiros de uso xeral por estrada e de estacións de autobuses, de competencia da Xunta de Galicia.

Logo da referida publicación, suscitouse por parte dalgúns interesados a existencia de dúbidas interpretativas en relación coa actualización da tarifa denominada mínimo de percepción, prevista no artigo 2 da referida orde.

Consonte coa habilitación establecida na disposición derradeira primeira da precitada orde, estímase procedente ditar esta instrución interpretativa, dirixida ás unidades administrativas dependentes da Dirección Xeral de Transportes que teñen que aplicar a referida norma, sen prexuízo da súa máxima difusión para xeral coñecemento de interesados en xeral.

2. Establece a indicada orde, no seu artigo 1, o procedemento xeral de revisión de tarifas; para o efecto, menciona que a súa revisión se efectuará, por instancia do concesionario, a partir do segundo trimestre de cada ano, baseándose na variación anual da media do índice de prezos de consumo (grupo xeral para o conxunto nacional) do ano inmediatamente anterior, así como a modificación do número de viaxeiros - quilómetro transportados pola concesión no ano natural inmediatamente anterior, en relación coa mesma magnitude correspondente ao ano precedente a aquel.

Esta regulación coincide coa previsión establecida no artigo 19.5º da Lei 16/1987, do 30 de xullo, de ordenación dos transporte terrestres (LOTT), marco en que se insire a orde de referencia, disposición legal que foi introducida pola Lei 24/2001, do 27 de decembro, que veu prever un mecanismo a través do cal proceder á actualización áxil das tarifas dos servizos concesionais, para o que, co sometemento á dita norma, se establece a súa non suxeición ao réxime establecido no artigo 16 do Real decreto lei 7/1996, do 7 de xuño, de medidas urxentes de carácter fiscal e de fomento e liberalización da actividade económica.

Ademais, a propia LOTT establece neste mesmo artigo que a revisión das tarifas dos servizos públicos regulares interurbanos permanentes de uso xeral de transporte de viaxeiros por estrada en réxime de concesión se efectuará dentro do segundo trimestre de cada ano.

3. Por outra parte, o artigo 2 da Orde do 6 de marzo de 2008 regula a figura da tarifa mínima de percepción, establecendo que:

A tarifa mínima de percepción para todos os servizos públicos de uso xeral de transporte de viaxeiros por estrada de competencia da Xunta de Galicia será actualizada anualmente pola Dirección Xeral de Transportes, aplicando ao importe vixente, antes do seu redondeo por exceso ou defecto ao céntimo de euro múltiplo de cinco máis próximo, o incremento do índice de prezos de consumo do ano inmediatamente anterior.

Cuestionouse, respecto deste precepto o que debe entenderse por índice de prezos de consumo, se o índice de prezos de consumo xeral e, neste caso, o galego ou o estatal, ou, en cambio, o índice de prezos de consumo do grupo xeral para o conxunto nacional.

Ao respecto, unha simple lectura sistemática da norma, atendendo ao seu contexto, leva a establecer a correspondencia entre o recollido nos seus artigos 1 e 2, referidos ambos ás tarifas dos servizos públicos regulares permanentes de transporte de viaxeiros de uso xeral por estrada, polo que a mención do índice de prezos de consumo ten que ser idéntica en ambos os casos.

Ademais, non pode ser outra a conclusión a que se chegue logo da análise desta norma no marco normativo en que se insire e, singularmente, dos artigos 19 da LOTT e 87 do Real decreto 1211/1990, do 28 de setembro, polo que se aproba o Regulamento da LOTT.

Esta interpretación é, ademais, coherente coa efectuada no acordo desta dirección xeral do 26 de marzo de 2007, respecto da fixación da tarifa mínima de percepción para o ano 2007, comunicada igualmente aos concesionarios de servizos de transporte público regular permanente de uso xeral por estrada.

Por tanto, non cabe senón chegar á conclusión de que resultará aplicable a variación anual da media do índice de prezos de consumo (grupo xeral para o conxunto nacional) á revisión do conxunto de tarifas das concesións de servizos públicos regulares permanentes de transporte de viaxeiros de uso xeral por estrada, e, dentro delas, á denominada tarifa mínima de percepción.

4. Respecto da revisión da tarifa mínima de percepción para o ano 2008, logo de aplicar o incremento medio que sufriu o índice oficial de prezos de consumo, grupo xeral para o conxunto nacional, do 2,79%, a Dirección Xeral de Transportes xa comunicou aos concesionarios dos servizos que a tarifa queda establecida consonte co indicado no anexo desta instrución, que se publica para xeral coñecemento.

Por tanto, non se poderán autorizar nin establecer tarifas mínimas de percepción por riba dos importes sinalados na indicada comunicación, debendo adoptarse por parte das unidades dependentes desta dirección xeral todas as medidas precisas para o control e seguimento da aplicación do réxime de revisión de tarifas e, se é o caso, proceder á tramitación de todos aqueles procedementos de sanción que resulten da constatación de irregularidades no cumprimento do réxime tarifario.

5. En canto se procede a ultimar unha ferramenta informática de consulta directa, na páxina web da Consellería de Política Territorial, Obras Públicas e Transportes http://www.cptopt.xunta.es/portal/cidadan/lang/gl/pid/174, exporanse ao público, dixitalizados, os cadros de tarifas de todas as concesións de servizos públicos regulares permanentes de transporte de viaxeiros de uso xeral por estrada e de estacións de autobuses, segundo se proceda á súa revisión no ano 2008.

Santiago de Compostela, 2 de abril de 2008.

Mar Chao López

Directora xeral de Transportes

Ver referencia pdf "06800D002P007.PDF"