O Pleno da Corporación, na sesión ordinaria que tivo lugar o día 20 de outubro de 2016, adoptou entre outros, o seguinte acordo:
Primeiro. Aprobar inicialmente a modificación puntual do Plan xeral de ordenación municipal (PXOM) para o sinalamento de aliñacións na N-525 (tramo I-núcleo da Susana), segundo o proxecto formulado de oficio pola sección de planeamento.
Segundo. Someter o expediente a información pública durante o prazo de dous meses, mediante anuncios que para o efecto se publicarán no Diario Oficial de Galicia e nun xornal dos de maior difusión na provincia.
A documentación sometida a información pública abarcará todos os documentos do expediente tramitado, e incluirá:
– O resumo executivo que exixe o artigo 25.3 do Real decreto lexislativo 7/2015, polo que se aproba o texto refundido da Lei do solo e rehabilitación urbana.
– A resolución da Secretaría Xeral de Calidade e Avaliación ambiental con data do 22 de agosto de 2016, pola que se formula o Informe ambiental estratéxico.
Durante o trámite de información pública, remitirase a modificación inicialmente aprobada a informe da Demarcación de Estradas do Estado en Galicia.
Terceiro. En cumprimento do que dispón o punto 7 do artigo 60 da LSG, o Concello trasladará a documentación á Secretaría Xeral de Ordenación do Territorio e Urbanismo, a fin de que por este órgano se outorgue audiencia aos municipios limítrofes e se soliciten os informes sectoriais autonómicos que resulten preceptivos.
O acordo de aprobación inicial determina ex lege, por aplicación do artigo 47.2 da LSG, a suspensión do outorgamento das licenzas que poidan resultar incompatibles coa nova ordenación proposta, durante o prazo máximo de dous anos, contado desde a aprobación inicial.
Cuarto. Ao abeiro do previsto polo artigo 85.2 do Real decreto 1812/1994 (Regulamento xeral de estradas), instar, perante o Ministerio de Fomento, un novo procedemento para fixar, no tramo correspondente á ordenanza 11, a liña de limitación de edificabilidade de acordo coa aliñación proposta no PXOM vixente.
O que se publica co fin de que, durante o prazo de dous meses, contado a partir do día seguinte ao da publicación deste anuncio, os interesados poidan consultar o expediente no Servizo de Planeamento e Xestión e formular as alegacións que xulguen oportunas. Na páxina web do Concello www.santiagodecompostela.gal, poderase consultar a documentación sometida a información pública.
Santiago de Compostela, 7 de novembro de 2016
O alcalde
P.D. (DEC/3997/2015, do 18 de xuño)
Jorge Duarte Vázquez
Concelleiro delegado de Espazos Cidadáns, Dereito á Vivenda e Mobilidade