En 1895, Emilia Pardo Bazán e Ramón Pérez Costales, promotor do Estatuto de Galicia durante a I República, impulsan a Comisión Xestora para a creación da Academia Galega, que non chega a bo porto.

Non é ata 1905, co apoio económico da Asociación Iniciadora e Protectora da Academia Galega, creada na Habana, e o aval do prestixio intelectual de Manuel Murguía, que se crea na Coruña a Real Academia Galega (RAG).

A súa primeira etapa, presidida ata 1923 por Murguía, caracterízase pola realización de numerosos actos por toda Galicia, a publicación por entregas dun dicionario galego e o inicio da publicación do Boletín da Academia Galega. Os anos posteriores están marcados pola inestabilidade, tras a prematura morte do novo presidente, Andrés Martínez Salazar; e a semiclandestinidade posterior á Guerra Civil.

Non é ata a incorporación dos intelectuais agrupados arredor da Editorial Galaxia, que a RAG toma un novo impulso, que se concreta en 1963 coa posta en marcha do Día das letras galegas, que se converte en elemento dinamizador da cultura e literatura de Galicia.

Xa en democracia, coa presidencia de Domingo García-Sabell (1977-1997), fírmase o Acordo Ortográfico, co Instituto da Lingua Galega, polo que se fixan as normas ortográficas e morfolóxicas do galego; recoñécese a RAG na Lei de Normalización Lingüística e créanse os seminarios de lexicografía e sociolingüística.

Coa entrada no século XXI dáse un grande empurre á informatización dos fondos documentais da institución.

Decretos

Decreto 112/2006, do 13 de xullo, polo que se concede a Medalla de Ouro de Galicia na súa categoría de ouro á Real Academia Galega

Discursos

Discurso do Presidente da Xunta de Galicia no acto de entrega da Medalla de Galicia 2006
PDF Discurso do Presidente da Xunta de Galicia no acto de entrega da Medalla de Galicia 2006