Nava Castro destaca que a nova oficina de turismo de Baiona dá resposta á intensa demanda turística rexistrada nos últimos anos

A directora de Turismo de Galicia manifestou que os turistas que se acheguen a Baiona dispoñerán dun centro de referencia con atención de calidade onde atopar toda a información turística que necesiten

No pasado ano, o destino Rías Baixas superou en máis dun 11% a súa cifra de viaxeiros e pernoitas incrementando en 3,7 puntos porcentuais a súa ocupación

A nova oficina é posible grazas a un convenio de colaboración asinado entre Turismo de Galicia e o Concello de Baiona a través do cal a Xunta de Galicia achegou un total de 100.000 euros

Baiona (Pontevedra), 17 de febreiro de 2017
  • whatsapp

A directora de Turismo de Galicia, Nava Castro, o delegado territorial da Xunta en Vigo, Ignacio López-Chaves, e o alcalde de Baiona, Ángel Manuel Rodal, inauguraron hoxe a nova oficina de Turismo do concello.

Durante o acto, Nava Castro explicou que este novo centro de información turístico, emprazado no parque de Palma e que conta cunha superficie de máis de 100 m2, dá resposta á intensa demanda turística rexistrada nos últimos anos no concello de Baiona.

Neste senso, a responsable de Turismo da Xunta fixo referencia ás últimas cifras publicadas polo Instituto Nacional de Estatística correspondentes ao pasado ano 2016. Segundo estas, o destino Rías Baixas superou a súa cifra de viaxeiros aloxados nun 11,4%, rexistrando 1,28 millóns de viaxeiros, e nun 11,8% o nivel de pernoitas, con máis de 3 millóns neste caso. “Este comportamento positivo da demanda permitiu que os establecementos hostaleiros das Rías Baixas mellorasen o pasado ano as cifras de ocupación do 2015, en 3,7 puntos porcentuais”, sinalou.

A directora de Turismo de Galicia manifestou que grazas a esta nova oficina os turistas que se acheguen a Baiona dispoñerán dun centro de referencia con atención de calidade onde atopar toda a información turística que necesiten.

“Esta mellora na atención ao turista contribuirá a continuar nesta senda de crecemento que vén experimentando Baiona nos últimos tempos”, concluíu Nava Castro.

Convenio de colaboración


A nova oficina é posible grazas a un convenio de colaboración asinado entre Turismo de Galicia e o concello de Baiona a través do cal a Xunta de Galicia achegou un total de 100.000 euros.

Imaxes relacionadas
Data de actualización: 17/02/2017