Agradece a disposición e profesionalidade das máis de 100 persoas que traballan en Galicia nesta ONG “porque aquí os menores están seguros, teñen formación e contan con profesionais que os atenden e coidan; un traballo onde hai un cariño, unha atención e un compromiso persoal”
Feijóo gaba o labor de Aldeas Infantiles SOS Galicia e destaca o compromiso da Xunta cun incremento do 40% dos orzamentos para programas de acollemento de menores

Salienta que, na actualidade, a Xunta ten baixo a súa responsabilidade a preto de 2.000 menores: “temos menores en acollemento residencial, é dicir, en residencias onde viven, se forman e se educan; temos menores en acollemento familiar e temos menores baixo acollemento de pre-adopción onde están listos para ser adoptados por familias que cumpran os requisitos”

Redondela (Pontevedra), 16 de febreiro de 2016
  • whatsapp whatsapp

O presidente do Goberno galego, Alberto Núñez Feijóo, gabou hoxe o labor de Aldeas Infantiles SOS Galicia e destacou o compromiso da Xunta cun incremento do 40% dos orzamentos para programas de acollemento de menores.

Durante unha visita ás instalacións desta ONG, Feijóo agradeceu o labor “de todos os que tutelan e os que dirixen as residencias dos menores; o labor daquelas familias extensas que se fan cargo dos seus netos ou dos seus sobriños, por exemplo; e daquelas familias alleas que non teñen ningunha relación de consanguinidade cos menores que coidan”.

O titular da Xunta reiterou o compromiso do Goberno galego coa política social; “unha política –afirmou- que ten ao menor como a semente do futuro pero que non esquece tampouco a discapacidade, nin a dependencia, nin aos maiores; en definitiva, a todos aqueles que necesitan da solidariedade do conxunto da sociedade galega”.

Sobre este punto, o responsable autonómico salientou que, na actualidade, a Xunta ten baixo a súa responsabilidade a preto de 2.000 menores. “E temos que buscar distintas fórmulas para que eses 2.000 menores teñan un acollemento, unha formación e podan incorporarse posteriormente á vida social e laboral”, dixo, precisando que, neste momento, “temos menores en acollemento residencial, é dicir, en residencias onde viven, se forman e se educan; temos menores en acollemento familiar e temos menores baixo acollemento de pre-adopción onde están listos para ser adoptados por familias que cumpran os requisitos”.

Logo de subliñar que no Programa de acollemento en familia allea hai 271 familias galegas que están dispostas a acoller menores, Feijóo concluíu agradecendo e poñendo en valor o traballo das máis de 100 persoas que traballan en Galicia en Aldeas Infantiles SOS. “Agradecer a súa disposición e a súa profesionalidade porque aquí os menores están seguros, teñen formación e contan con profesionais que os atenden e coidan; un traballo onde hai un cariño, unha atención e un compromiso persoal e, en consecuencia, cun valor engadido fundamental como é coidar a un menor no momento que máis o necesita”.
 

Imaxes relacionadas
Data de actualización: 16/02/2016