Anxo Lorenzo reivindica o centenario das Irmandades como unha ocasión para recuperar figuras de referencia na construción de Galicia

No acto de inauguración do congreso Toxos, Ferrol e as Irmandades da Fala, o secretario xeral de Cultura cualificou o movemento como “motor de moitas das aspiracións colectivas do século XX no aspecto lingüístico, cultural e político”

Ferrol, 28 de outubro de 2016
  • whatsapp whatsapp

A cidade de Ferrol acolle entre hoxe e mañá a celebración do Congreso Extraordinario Terra de Trasancos ‘Toxos, Ferrol e as Irmandades da Fala’, “dúas xornadas de reflexión e recuperación da memoria das Irmandades vinculada coa historia da cidade de Ferrol”. Así o asegurou esta tarde o secretario xeral de Cultura, Anxo Lorenzo, no acto de apertura do congreso, no que se referiu ao centenario da Irmandades como “unha oportunidade para recuperarmos para o noso presente figuras de referencia na construción de Galicia, como Xaime Quintanilla, ou perfís máis esquecidos, como o de todos aqueles que puxeron as esperanzas e as reivindicacións do seu tempo en trazos: os ilustradores, os debuxantes”.

Ademais de salientar a súa condición de “movemento motor de moitas das aspiracións colectivas do século XX no aspecto lingüístico, cultural e político”, Anxo Lorenzo fixo fincapé na “renovación cultural” levada a cabo polas Irmandades da Fala, que “abriu novas vías para o desenvolvemento das artes en Galicia, tanto na plástica, como na música e na literatura”.

Segundo expresou, o congreso tamén é unha oportunidade para “volvermos ás bases dunha das institucións fundamentais para a difusión do folclore e das tradicións musicais de Galicia, o Real Coro Toxos e Froles”, entidade coordinadora, xunto coa Real Academia Galega, dun congreso promovido polo Concello de Ferrol, que incluirá diversas mesas redondas e que dá comezo coa conferencia “As Irmandades da Fala, algo máis ca un movemento pola lingua”, a cargo de Xesús Alonso Montero, presidente da RAG.

Unha celebración compartida

A Consellería de Cultura e Educación –a través das secretarías xerais de Cultura e de Política Lingüística–, a Deputación da Coruña, o Consello da Cultura Galega, a Real Academia Galega e o Museo do Pobo Galego, coa colaboración de concellos e doutras entidades públicas e privadas, veñen desenvolvendo desde o mes de maio iniciativas de diversa índole, que van desde o acto conmemorativo das Irmandades da Fala celebrado na cidade da Coruña á exposición itinerante ‘Saúde e terra, irmáns e irmás’, pasando por iniciativas nas bibliotecas, nos arquivos, nos centros educativos etc.

“Nun formato de colaboración entre institucións, de presenza no conxunto do territorio –como se concibiron as Irmandades e como pensamos que debemos seguir construíndo o desenvolvemento cultural e social de Galicia–, logramos que, neste 2016, a memoria deses inicios das Irmandades volvese estar presente na reflexión e mesmo na axenda cultural da actualidade de Galicia”, concluíu Anxo Lorenzo.

Data de actualización: 28/10/2016