A Lei 4/1988, do 26 de maio, da función pública de Galicia, no seu artigo 29, establece os criterios en que debe enmarcarse a oferta de emprego público, concibida como instrumento de programación das necesidades de persoal e de racionalización do emprego público e dos procesos de selección do persoal ao servizo das administracións públicas, nos que deben primar os principios constitucionais de igualdade, mérito e capacidade.
O artigo 34 da dita Lei 4/1988, establece os sistemas de acceso para o ingreso na función pública, mediante convocatoria pública, baseados nos principios constitucionais de igualdade, mérito e capacidade.
Así mesmo, e de conformidade co disposto no artigo 22.1º da Lei 30/1984, do 2 de agosto, de medidas para a reforma da función pública, a promoción interna poderá levarse a cabo en convocatorias independentes das de ingreso.
En aplicación do disposto na Lei 13/2004, do 29 de decembro, de orzamentos xerais da Comunidade Autónoma de Galicia para o ano 2005, e co obxecto de favorecer a estabilidade no emprego, esta oferta de emprego incluirá as prazas de Administración xeral e especial desempeñadas por persoal interino, nomeado ou contratado nos dous exercicios anteriores, excepto aquelas sobre as que exista unha reserva do posto ou que estean incursos en procesos de provisión, e de persoal laboral.
Polo anterior, e tendo en conta os postos de traballo vacantes en distintos corpos e escalas de Administración xeral e especial e de persoal laboral desta comunidade autónoma que afectan o funcionamento dos servizos públicos esenciais, de conformidade co previsto no artigo 27 da Lei 13/2004, do 29 de decembro, de orzamentos xerais da Comunidade Autónoma de Galicia para o ano 2005, así como no artigo 20 da Lei 2/2004, do 27 de decembro,
de orzamentos xerais do Estado para o ano 2005, cómpre a aprobación da oferta de emprego público relativa ao persoal funcionario de distintos corpos e escalas de Administración xeral e especial, así como ao persoal laboral, no ano 2005.
Na súa virtude, consultadas as organizacións sindicais correspondentes, logo de informe da comisión de persoal, cos votos..., e de conformidade co establecido no artigo 12.8º da Lei 4/1988, do 26 de maio, por proposta do conselleiro da Presidencia, Relacións Institucionais e Administración Pública e logo de deliberación do Consello da Xunta de Galicia na súa reunión do día dezaseis de xuño de dous mil cinco,
DISPOÑO:
Artigo 1º.-Aprobación da oferta de emprego público.
Apróbase a oferta de emprego público correspondente a distintos corpos e escalas de Administración xeral e especial, así como de distintas categorías de persoal laboral fixo da Xunta de Galicia para o 2005 nos termos que se establecen neste decreto, e de conformidade co disposto no artigo 29.6º da Lei 4/1988, do 26 de maio, da función pública de Galicia.
Artigo 2º.-Cuantificación da oferta de emprego público.
Nesta oferta de emprego público inclúense as necesidades de recursos humanos con asignación orzamentaria que non poden ser cubertas cos efectivos de persoal existentes, de acordo cos criterios e segundo a composición que se detalla no anexo.
Artigo 3º.-Persoal de novo ingreso.
3.1. Nos corpos e escalas de Administración xeral da Xunta de Galicia, ofertaranse as prazas que especificamente se detallan no anexo e o sistema de selección será o de oposición.
3.2. Na Administración especial da Xunta de Galicia, ofertaranse as prazas correspondentes aos corpos que especificamente se detallan no anexo, nos termos previstos nas disposicións transitorias décima e décimo primeira da Lei 4/1988, do 26 de maio, da función pública de Galicia e o sistema de selección será o de concurso-oposición.
3.3. Para as distintas categorías do persoal laboral fixo da Administración da Xunta de Galicia, ofertaranse as prazas que se detallan no anexo e o sistema de selección será o de concurso-oposición.
Artigo 4º.-Promoción interna.
4.1. En 2005, en consonancia co acordo da mesa sectorial de funcionarios do 8 de outubro de 2003, co obxecto de fomentar a promoción interna, convocaranse 40 prazas para o corpo auxiliar da Xunta, grupo D. Este proceso selectivo de promoción interna levarase a cabo nunha convocatoria independente das de ingreso.
4.2. Realizarase unha promoción interna separada a través dun concurso-oposición para permitir que os funcionarios do corpo subalterno da Xunta, poidan promocionar ao grupo inmediato superior sempre e cando teñan a titulación necesaria e teñan prestados servizos efectivos, durante cando menos dous anos, como funcionario de carreira do referido corpo.
Artigo 5º.-Persoas con discapacidade.
5.1. Nos procesos selectivos para o ingreso en corpos e escalas de funcionarios, así como nos de promoción interna, serán admitidas as persoas con minusvalidez nos termos previstos neste artigo e demais normativa aplicable.
As convocatorias non establecerán exclusións por limitacións psíquicas e/ou físicas sen prexuízo das incompatibilidades co desempeño das tarefas ou funcións correspondentes.
Nas probas selectivas, incluíndo os cursos de formación ou período de prácticas, estableceranse, para as persoas con minusvalidez que o soliciten, as adaptacións posibles de tempo e/ou medios para a súa realización. Nas convocatorias indicarase expresamente esta posibilidade, así como que os interesados deberán formular a correspondente petición concreta na solicitude de participación.
Para tal efecto os tribunais ou comisión de selección poderán requirir informe e, se é o caso, colaboración dos órganos técnicos da Administración laboral, sanitaria ou dos órganos competentes.
5.2. En cada convocatoria reservarase o cinco por cento das vacantes ofertadas para seren cubertas por quen teña a condición legal de persoa con minusvalidez, de conformidade co previsto na disposición adicional sétima da Lei 4/1988, do 26 de maio.
Cando o resultado da aplicación da citada porcentaxe dea un resto igual ou superior a 0,5 prazas de reserva computarase como unha praza a incluír en tal cota.
En todo caso, en cada convocatoria establecerase o número concreto de prazas que quedan reservadas para persoas con minusvalidez ás que puidera corresponder esta cota. Farase constar así mesmo que non se reserva ningunha praza no suposto de que non se alcanzase o mínimo necesario para isto de acordo co previsto nos puntos anteriores.
A opción a prazas reservadas terá que formularse na solicitude de participación nas convocatorias con declaración expresa dos interesados de reunir a condición exixida ao respecto, que se acreditará se obtivese praza, mediante certificación dos órganos competentes. As probas selectivas realizaranse en condicións de igualdade co resto dos aspirantes de promoción interna ou de novo ingreso, segundo corresponda, sen prexuízo das adaptacións previstas neste artigo.
Se na súa realización se lle suscitaran dúbidas ao tribunal respecto da capacidade do aspirante para o desempeño das actividades habitualmente desen
volvidas polos funcionarios do corpo ou escala ao que se opta, poderán solicitar o correspondente ditame do órgano competente.
Con anterioridade ao nomeamento e unha vez superado o proceso selectivo a Consellería da Presidencia, Relacións Institucionais e Administración Pública, poderá requirir, respecto das persoas que acceden por esta cota de reserva, ditame do órgano competente sobre a compatibilidade do candidato para o posto de traballo ou sobre as adaptacións deste último.
Ademais do anterior, os procesos selectivos deberán incluír a posibilidade de que nas convocatorias nas que se estableza unha cota de reserva para discapacitados, unha vez cubertas as prazas desta cota, os aspirantes que superaran a fase de oposición, sen obter praza pola devandita cota, poidan optar, en igualdade de condicións, ás prazas do sistema xeral, tanto no caso de acceso por promoción interna como na da quenda libre.
Disposicións derradeiras
Primeira.-Facúltase o conselleiro da Presidencia, Relacións Institucionais e Administración Pública para ditar, dentro das súas competencias, as normas precisas para o desenvolvemento deste decreto.
Segunda.-Este decreto entrará en vigor o día seguinte ao da súa publicación no Diario Oficial de Galicia.
Santiago de Compostela, dezaseis de xuño de dous mil cinco.
Manuel Fraga Iribarne
Presidente
Jaime Pita Varela
Conselleiro da Presidencia, Relacións Institucionais e Administración Pública
ANEXO
I. Corpos e escalas de Administración xeral e especial
Grupo A Administración xeral: Superior de Administración da Xunta de Galicia 20 Escala de letrados 7 Administración especial: Escala de arquitectos 14 Escala de enxeñeiros industriais 15 Escala de químicos 4 Escala de arqueólogos 6
Grupo B Administración especial: Escala de arquitectos técnicos 17 Escala de enxeñeiros técnicos de obras públicas 9 Escala de topógrafos 3
Grupo C Administración xeral: Escala de subinspectores/as de consumo 8 Administración especial: Escala de delineantes 7
Grupo D Administración xeral: Corpo auxiliar da Xunta 117 Administración especial: Escala de axentes forestais 100
Grupo E Administración xeral: Subalterno da Xunta 70 Total de prazas de administración xeral e especial: 397
II. Persoal laboral fixo.
vacantes
Categoría Número de
Grupo I 4: Titulado/a superior 70 6: Titulado/a superior psicólogo 27 37: Titulado/a superior ambiental 16 Total I 113
Grupo II 2: ATS. Enfermeiro/a. Practicante. DUE 23 6: Educador/a, mestre/a especial 34 7: Titulado/a grao medio 12 17: Asistente social 19 Total II 88
Grupo III 50: Técnico/a especialista xardín de infancia 17 63: Oficial 1ª condutor/a e outros 40 64.Oficil 1ª tractorista e outros 12 65: Oficial 1ª cociña e outros 15 66: Axudante taller. Adxunto/a taller 14 67: Capataz de obras e outros 13 68: Oficial 1ª agrario. Capataz agrario 11 Total III 122
Grupo IV 3: Auxiliar sanitario e outros 52 4: Auxiliar fogar e outros 82 5: Oficial 2ª cociña. Cociñeiro/a oficial 2ª 107 9: Oficial 2ª agrario 17 11: Auxiliar laboratorio 10 16: Condutor/a 14 31: Camiñeiro/a 68 35: Auxiliar arquivos e bibliotecas 17 Total IV 367
Grupo V 1: Camareiro/a limpador/a e outros 167 2: Axudante traballos ou oficios e outros 39 3: Ordenanza e outros 66 11: Limpador/a e outros 199 12: Peón/ona e outros 18 10E: Vixiante de arquivos, bibliotecas e museos 24 Total V 513
Total de prazas de persoal laboral fixo: 1.203 Total da oferta 1.600