A Lei 6/2003, do 9 de decembro, de taxas, prezos e exaccións reguladoras da Comunidade Autónoma de Galicia, establece no seu capítulo II, do título II, o réxime xeral de xestión, recadación e recursos en materia de prezos públicos.

O artigo 47 da mencionada lei sinala que os prezos públicos serán fixados por decreto, por proposta da consellería da que dependa o órgano ou entidade oferente.

O artigo 21 da Lei 7/2003, do 9 de decembro, de ordenación sanitaria de Galicia, establece que lle corresponde á Consellería de Sanidade aprobar os módulos económicos para a prestación de servizos propios, conveniados ou contratados do Servizo Galego de Saúde, así como a súa modificación

En virtude do Decreto 276/2001, do 27 de setembro, de adaptación das fundacións sanitarias á disposición adicional sétima da Lei 5/2000, do 28 de decembro, de medidas fiscais e de réxime orzamentario e administrativo, os ingresos procedentes da prestación de servizos sanitarios por parte das fundacións teñen a consideración de ingresos de dereito público.

As tarifas aplicables pola Fundación Pública Centro de Transfusión Sanguínea de Galicia están recollidas no Decreto 83/2004, do 15 de abril, polo que se establecen as tarifas dos servizos sanitarios prestados nos centros dependentes do Servizo Galego de Saúde e nas fundacións públicas sanitarias.

O Decreto 159/2005, do 2 de xuño, derroga o Decreto 83/2004, do 15 de abril, coa excepción do anexo V, que establece os prezos públicos aplicables pola Fundación Pública Centro de Transfusión Sanguínea de Galicia.

A efectos de adecuar as tarifas ao custo económico derivado dos servizos ou actividades prestadas faise necesario actualizar o anexo V do Decreto 83/2004, do 15 de abril.

En consecuencia, co fin de regular a percepción dos prezos públicos por asistencia sanitaria prestada pola Fundación Pública Centro de Transfusión Sanguínea de Galicia, por proposta do conselleiro de Sanidade, co informe favorable da Consellería de Economía e Facenda e logo de deliberación do Consello da Xunta de Galicia na súa reunión do día nove de xuño de dous mil cinco,

DISPÓN:

Artigo 1º

Apróbanse as tarifas que figuran no anexo I deste decreto, aplicables aos servizos sanitarios prestados pola Fundación Pública Centro de Transfusión Sanguínea de Galicia a pacientes que non sexan beneficiarios da Seguridade Social, así como naqueles casos nos que, sendo beneficiarios, exista un terceiro obrigado ao pagamento que deba asumir o gasto sanitario.

Nos supostos de terceiros obrigados ao pagamento, por tratarse de gastos non financiables con ingresos da Seguridade Social (artigo 83 da Lei 14/1986, do 25 de abril, xeral de sanidade), cando o paciente non facilite os datos do terceiro obrigado para a súa correcta facturación, o gasto asistencial será ao seu cargo.

Artigo 2º

A facturación realizarase coas tarifas vixentes o día da prestación do servizo.

Disposición derrogatoria

Queda derrogado o anexo V do Decreto 83/2004, do 15 de abril, polo que se establecen as tarifas dos servizos sanitarios prestados nos centros dependentes do Servizo Galego de Saúde e nas fundacións públicas sanitarias.

Disposicións derradeiras

Primeira.-Facúltase o conselleiro de Sanidade para ditar cantas disposicións sexan necesarias para o desenvolvemento e execución do establecido neste decreto.

Segunda.-Este decreto entrará en vigor o día seguinte ao da súa publicación no Diario Oficial de Galicia.

Santiago de Compostela, nove de xuño de dous mil cinco.

Manuel Fraga Iribarne

Presidente

P.S. (Decreto 148/2005, do 7 de xuño)

Jaime Pita Varela

Conselleiro de Sanidade

ANEXO I

Prezos aplicables pola Fundación Pública

Centro Transfusión Sanguínea de Galicia

A. Por servizos hemoterápicos

(En euros)

B. Por probas analíticas

C. Criopreservación

D. Sangue de cordón umbilical