O 2 de xullo de 2007 publicouse a Orde do 25 de xuño de 2007 pola que se convocan as subvencións aos concellos para resolver o problema da infravivenda rural e se modifican as bases de convocatoria recollidas na Orde do 6 de xullo de 2006.

O punto 1.4 do artigo 7 da Orde do 6 de xullo de 2006 establece que os concellos presentarán un calendario de execución coa previsión das porcentaxes anuais de execución.

Unha vez finalizado o prazo de presentación de solicitudes resulta que a maioría dos concellos prevén o inicio da execución nos exercicios seguintes ao actual. Por este motivo non é necesario facer unha disposición de crédito en exercicio corrente que garanta o recoñecemento de obrigas, sendo posíble liberar parte do crédito que figuraba na orde de convocatoria para dedicalo a outros compromisos no exercicio corrente. Por outra banda, a previsión de execución para exercicios futuros determina a necesidade de aumentar o crédito destinado para tal fin na orde de convocatoria do 2 de xullo de 2007.

Neste senso, o artigo 4 da citada orde establece a consignación orzamentaria e os importes máximos destas subvencións para as dos puntos I A) e B) e II D) do artigo 3 da Orde do 6 de xullo de 2006.

Esta orde, á vista de que as solicitudes presentadas polos concellos prevén un reducido gasto de execución material para o exercicio corrente de 2007, reduce a cantidade asignada para tal fin para os puntos I A) e B) e II D) do artigo 3 da Orde do 6 de xullo de 2006 en 450.000 € no crédito que figura consignado para esta finalidade na aplicación 17.02.451A.760.2. Así mesmo, polo mesmo motivo, reduce as cantidades asignadas para as actuacións dos apartados I C) e II E) do artigo 3º da Orde do 6 de xullo de 2006 en 300.000 €, no crédito que figura consignado para esta finalidade na aplicación 17.02.451B.760.0 do estado de gastos dos orzamentos xerais da Comunidade Autónoma de Galicia para o ano 2007.

Por outra banda, á vista das necesidades estimadas para compromisos futuros e de que existe crédito dispoñible, amplía o importe máximo das axudas aos concellos para as actuacións dos puntos I A) e B) e II D) do artigo 3 da Orde do 6 de xullo de 2006 nun importe de 2.000.000 de €, con cargo aos orzamentos de 2008, e nun importe de 2.000.000 de € con cargo aos orzamentos de 2009, de acordo cos límites plurianuais do crédito que figura consignado para esta finalidade na aplicación 17.02.451A.760.2

Por todo isto,

DISPOÑO:

Artigo único.

Un.-Para os efectos do disposto no artigo 4 da Orde do 7 de xuño de 2007 e para dar cobertura aos expedientes que acaden neste exercicio a fase de concesión da subvención, determínase:

1. O importe máximo destas subvencións referidas ás actuacións dos puntos I A) e B) e II D) do artigo 3 da Orde do 6 de xullo de 2006, con cargo ao crédito que figura consignado para esta finalidade na aplicación 17.02.451A.760.2 do estado de gastos dos orzamentos xerais da Comunidade Autónoma de Galicia para o ano 2007 redúcese nun importe de 450.000 € e aumenta, nun importe de 2.000.000 de €, a cantidade asignada con cargo aos orzamentos de 2008, e nun importe doutros 2.000.000 de € a cantidade asignada con cargo aos orzamentos de 2009, doutros cos créditos plurianuais que figuran consignados para esta finalidade na aplicación 17.02.451A.760.2

2.-O importe máximo destas subvencións referidas ás actuacións dos puntos I C) e II E) do artigo 3 da Orde do 6 de xullo de 2006, con cargo ao crédito que figura consignado para esta finalidade na aplicación 17.02.451B.760.0 do estado de gastos dos orzamentos xerais da Comunidade Autónoma de Galicia para o ano 2007, redúcese nun importe de 300.000 €, quedando as restantes cantidades sen modificar.

Disposición derradeira

Única.-Esta orde entrará en vigor o mesmo día da súa publicación no Diario Oficial de Galicia.

Santiago de Compostela, 20 de decembro de 2007.

Teresa Táboas Veleiro

Conselleira de Vivenda e Solo