1. Antecedentes.

1.1. Esta consellería, mediante Orde do 13 de xullo de 2007, acordou, de conformidade co punto 5 b) do artigo 85 da Lei 9/2002, non outorgar a aprobación definitiva do Plan Xeral de Ordenación Municipal do Concello de Castroverde (Lugo) entrementres non se realizasen as modificacións necesarias para corrixir as deficiencias que a propia orde establecía.

1.2. O Pleno do Concello de Castroverde aprobou, o 23 de novembro de 2007, as modificacións introducidas no Plan Xeral de Ordenación Municipal.

1.3. O concello remítelle un exemplar das modificacións introducidas no plan xeral á Consellería de Política Territorial, Obras Públicas e Transportes para resolver sobre a súa aprobación definitiva, que ten entrada no rexistro desta con data do 13 de decembro de 2007.

1.4. A Consellería de Política Territorial, Obras Públicas e Transportes, en virtude do previsto no artigo 85.5º da Lei 9/2002, do 30 de decembro, de ordenación urbanística e protección do medio rural de Galicia, e do establecido na propia Orde do 13 de xullo de 2007, require o Concello de Castroverde, con data do 18 de decembro de 2007, para que achegue a documentación completa que conforma o Plan Xeral de Ordenación Municipal.

1.5. Este requirimento foi atendido polo Concello de Castroverde achegando a documentación solicitada, mediante escrito que tivo entrada nesta consellería con data do 14 de xaneiro de 2008.

2. Consideracións e fundamentación.

A Dirección Xeral de Urbanismo, con data do 14 de marzo de 2008, elevou o seguinte informe ao respecto do contido do Plan Xeral de Ordenación Municipal de Castroverde:

2.1. Para o cumprimento da Orde do 13 de xullo de 2007, o Concello de Castroverde presenta un exemplar corrixido do Plan Xeral de Ordenación Municipal, do cal se deben realizar as seguintes consideracións:

-O PXOM non incorpora a ordenación detallada, co mesmo contido e determinacións exixibles a un plan parcial do sector de solo urbanizable residencial SURD-1, e non se garante a execución deste a través de actuacións públicas programadas ou privadas concertadas coa Administración, de maneira que non cabe a aplicación do disposto no artigo 57.2º da Lei 9/2002, polo que debe incluírse a exixencia de desenvolvemento deste sector mediante un plan parcial.

-En canto ao sector de solo urbanizable industrial SURD-2, o PXOM non incorpora a súa ordenación detallada, co mesmo contido e determinacións exixibles a un plan parcial. Ademais, non consta que o convenio subscrito entre o Concello de Castroverde e a Deputación Provincial de Lugo fose sometido ao preceptivo trámite de información pública (artigo 235 da Lei 9/2002), motivos polos cales non cabe a aplicación do disposto no artigo 57.2º da Lei 9/2002, polo que debe incluírse a exixencia de desenvolvemento deste sector mediante un plan parcial.

-O material empregado nas cubertas dos edificios do núcleo urbano de Castroverde (fóra dos edificios industriais e os correspondentes a grandes equipamentos) é a lousa, sen embargo a normativa só recolle a obrigatoriedade dese material nos ámbitos atinxidos polo Camiño de Santiago; os restantes ámbitos do núcleo urbano quedan na indefinición nese aspecto. Polo que para lle dar cumprimento ao disposto nos artigos 46.1º e 104 c) da Lei 9/2002, e como xa se indicou no informe previo á aprobación inicial, debe quedar reflectida na normativa do plan a obriga da utilización da lousa como material de cubrición, coas excepcións debidamente xustificadas na singularidade do edificio.

2.2. Co fin de corrixir estas deficiencias, o PXOM debe incluír as seguintes determinacións:

-Na normativa do PXOM, título IX, Normas particulares do solo urbanizable, capítulo 44, o punto 44.3 debe substituír o contido do número 1 polo seguinte: «O desenvolvemento dos sectores de solo urbanizable delimitado realizarase mediante os seus correspondentes plans parciais». Igualmente, na normativa, no seu anexo III «Sectores de solo urbanizable», substituirase a frase «O desenvolvemento do solo urbanizable delimitado deste plan xeral posúe a ordenación detallada polo que se desenvolverá a través dun proxecto de urbanización», pola seguinte: «O desenvolvemento dos sectores de solo urbanizable delimitado deste plan xeral desenvolverase a través dos seus correspondentes plans parciais».

-Na normativa do PXOM, título VI, Normas de edificación, capítulo 31, Condicións de estética, debe incluírse un punto 31.11 que especifique: «O material de cubrición será a lousa, coas posibles excepcións debidamente xustificadas polas características singulares da edificación».

3. Resolución.

Visto canto antecede,

RESOLVO:

Primeiro.-Aprobar definitivamente o Plan Xeral de Ordenación Municipal de Castroverde (Lugo), de acordo co disposto no punto 5 a) do artigo 85 da Lei 9/2002, do 30 de decembro, de ordenación urbanística e protección do medio rural de Galicia (modificada pola Lei 15/2004), nos seguintes termos:

a) Na normativa do PXOM, título IX, Normas particulares do solo urbanizable, capítulo 44, o punto 44.3 debe substituír o contido do número 1 polo seguinte: «O desenvolvemento dos sectores de solo urbanizable delimitado realizarase mediante os seus correspondentes plans parciais». Igualmente, na normativa, no seu anexo III, Sectores de solo urbanizable, substituirase a frase «O desenvolvemento do solo urbanizable delimitado deste plan xeral posúe a ordenación detallada polo que se desenvolverá a través dun proxecto de urbanización» pola seguinte: «O desenvolvemento dos sectores de solo urbanizable delimitado deste plan xeral desenvolverase a través dos seus correspondentes plans parciais».

b) Na normativa do PXOM, título VI, Normas de edificación, capítulo 31, Condicións de estética, debe incluírse un punto 31.11 que especifique: «O material de cubrición será a lousa, coas posibles excepcións debidamente xustificadas polas características singulares da edificación».

Segundo.-De conformidade co disposto polos artigos 92 da Lei 9/2002 e 70 da Lei 7/1985, do 2 de abril, reguladora das bases de réxime local, o concello deberá publicar no BOP a normativa e as ordenanzas do Plan Xeral de Ordenación Municipal aprobado definitivamente, nos termos en que se aproba.

Terceiro.-Contra esta orde, que lle pon fin á vía administrativa, cabe interpoñer recurso contencioso-administrativo ante a sala correspondente do Tribunal Superior de Xustiza de Galicia, no prazo de dous meses, que se contarán desde o día seguinte ao da súa publicación, segundo dispoñen os artigos 10 e 46 da Lei 29/1998, do 13 de xullo, reguladora da xurisdición contencioso-administrativa.

Cuarto.-Notifíqueselle esta orde ao concello e publíquese no Diario Oficial de Galicia.

Santiago de Compostela, 14 de marzo de 2008.

María José Caride Estévez

Conselleira de Política Territorial, Obras Públicas e Transportes