Con data do 31 de xullo de 2008 foi presentada na Comunidade Autónoma de Galicia a solicitude de rexistro da indicación xeográfica protexida Androlla de Galicia.
O Regulamento 510/2006 do Consello, do 20 de marzo, establece o procedemento para a inscrición das indicacións xeográficas e das denominacións de orixe dos produtos agrícolas e alimenticios no rexistro comunitario.
No seu artigo 5, parágrafo 5, determina que o Estado membro iniciará un procedemento nacional de oposición, garantindo unha publicación adecuada da solicitude e establecendo un prazo razoable durante o cal calquera persoa física ou xurídica que posúa un interese lexítimo e estea establecida ou resida no seu territorio poderá declarar a súa oposición á solicitude.
En desenvolvemento do dito precepto, o Goberno de España ditou o Real decreto 1069/2007, do 27 de xullo, polo que se regula o procedemento para a tramitación das solicitudes de inscrición no rexistro comunitario das denominacións de orixe protexidas e das indicacións xeográficas protexidas e a oposición a elas. No seu artigo 6 establécese que, unha vez comprobada a solicitude, o órgano competente da comunidade autónoma publicará no BOE un anuncio desta que inclúa o documento único previsto no artigo 11 do Regulamento (CE) nº 1898/2006, da Comisión, que establece as disposicións de aplicación do R (CE) 510/2006, para que no prazo do dous meses a partir da data da súa publicación no BOE os interesados poidan opoñerse ao rexistro pretendido.
Por outra parte, con base nas competencias da Comunidade Autónoma galega en materia de denominacións de orixe, a Xunta de Galicia ditou o Decreto 4/2007, do 18 de xaneiro, polo que se regulan as denominacións xeográficas de calidade do sector alimentario e os seus consellos reguladores. O seu artigo 4, parágrafo 1, dispón que o documento único se someterá tamén a información pública no Diario Oficial de Galicia.
Polo exposto e no exercicio das competencias que teño atribuídas de acordo co artigo 4 do citado Decreto 4/2007,
RESOLVO:
Dar publicidade á solicitude de rexistro da indicación xeográfica protexida Androlla de Galicia mediante a publicación no Diario Oficial de Galicia e no BOE do documento único que figura como anexo, establecéndose un prazo de dous meses desde a data da súa publicación no BOE para que calquera persoa, física ou xurídica, que estea establecida ou resida legalmente en España, cuxos lexítimos intereses considere afectados, poida opoñerse ao dito rexistro mediante a correspondente declaración de oposición, dirixida á Dirección Xeral de Produción, Industrias e Calidade Agroalimentaria, da Consellería do Medio Rural, de acordo co establecido no artigo 4.1 do Decreto 4/2007, do 18 de xaneiro, e no artigo 6 do Real decreto 1069/2007, do 27 de xullo.
O expediente desta solicitude poderá ser examinado na sede da dita dirección xeral, sita nos edificios administrativos de San Caetano s/n, en Santiago de Compostela.
Santiago de Compostela, 8 de agosto de 2008.
Antonio Oca Fernández
Director xeral de Produción, Industrias e Calidade Agroalimentaria
ANEXO
Documento único
Regulamento (CE) Nº 510/2006, do Consello, sobre a protección das indicacións xeográficas e das denominacións de orixe dos produtos agrícolas e alimenticios.
Androlla de Galicia.
Nº CE:
5 IXP DOP
1. Denominación:
Androlla de Galicia.
2. Estado membro:
España.
3. Descripción do produto agrícola ou alimenticio:
3.1 Tipo de produto:
Clase 1.2-Produtos cárnicos (cocidos, en salgadura, afumados, etc.).
3.2 Descrición do produto:
A Androlla é o produto cárnico resultante da mestura de costela (mínimo 90%) e coiros, obtida a partir de despezamentos de porco, convenientemente aderezada e embutida en intestino groso de porcino ou de vacún, e que posteriormente se someten a un proceso de afumadura con leña de carballo (Quercus robur L.) e curación. O seu consumo realízase logo de cocción.
As características do produto son as seguintes: forma e aspecto exterior definidas pola forma da tripa, coa textura e rugosidades propias desta; peso variable, que oscila entre un mínimo de 0,2 kg e un máximo de 1 kg; consistencia firme, compacta ao tacto; ao corte presenta un aspecto heteroxéneo e non moi ligado; cor vermella intensa, definida pola materia prima e os condimentos; aroma, tamén intenso, a embutido adobado e afumado; sabor agradable, picante e cunha equilibrada relación doce/salgado; textura febrosa e non homoxénea, dependendo da porción que se deguste.
3.3 Materias primas:
A materia prima procederá de machos castrados ou femias que non estean en celo no momento do sacrificio. Os animais empregados para a reprodución non se utilizarán para a obtención de androllas amparadas pola indicación xeográfica protexida.
3.5 Fases específicas da produción que se deben levar a cabo na zona xeográfica definida.
Para a elaboración de androllas protexidas, a carne seleccionada estará formada pola mestura de costela, nun mínimo do 90%, e coiros. Como condimento utilizarase sal común, pementón doce e picante, allo e, opcionalmente, sal nitrificante e ourego.
O proceso de elaboración consiste nunha serie de fases:
-Selección da carne.
-Picadura dos ingredientes en anacos ou porcións regulares.
-Adición dos condimentos: sal, allo, pementón doce e picante e, opcionalmente, sal nitrificante e ourego.
-Maceración, durante un período mínimo de 12 horas.
-Embutido en intestino groso de porcino ou de vacún e atado, que poderá ser manual ou automático, con cordel de algodón ou grampado.
-Afumadura, no que se empregará leña seca de carballo, especie do xénero Quercus (Quercus robur L.) típica da rexión.
-Curado, fase final do proceso de elaboración, en que se realiza o proceso de secado e maduración cun mínimo de 5 días, contados a partir do embutido. Este proceso desenvolverase en locais acondicionados para o efecto ou en secadoiros naturais, que permitan un control da ventilación e, polo tanto, lograr unhas condicións óptimas de temperatura e humidade relativa, de forma que o produto resultante adquira as características tradicionais en canto a cor, aroma e sabor propias da androlla galega.
A selección e picadura da carne, adobo e mestura, maceración, afumadura e curación, serán realizados de acordo co saber facer tradicional dos elaboradores da zona, para obter un produto de máxima calidade.
3.7 Normas especiais sobre a etiquetaxe:
As androllas comercializadas baixo o amparo da indicación xeográfica protexida Androlla de Galicia, deberán levar en cada peza, tras a certificación, unha etiqueta propia da indicación xeográfica, de codificación alfanumérica e numeración correlativa, autorizada e expedida polo órgano de control, co logotipo oficial da indicación xeográfica protexida.
Tanto na etiqueta comercial de cada elaborador como na etiqueta propia da indicación xeográfica figurará obrigatoriamente a mención indicación xeográfica protexida Androlla de Galicia.
4. Descrición sucinta da zona xeográfica:
A zona xeográfica de elaboración da IXP Androlla de Galicia está formada por 12 concellos da provincia de Lugo e 17 da provincia de Ourense, que constitúen unha estreita franxa que se estende, de norte a sur, na parte máis oriental de Galicia, abarcando a zona máis montañosa da Comunidade Autónoma. É este o territorio en que tradicionalmente se vén elaborando este produto.
O conxunto de concellos que conforman esta zona xeográfica aparecen enunciados no prego de condicións.
5. Vínculo coa zona xeográfica:
5.1 Carácter específico da zona xeográfica
A área xeográfica delimitada para a elaboración da Androlla de Galicia posúe unhas características orográficas, climáticas e sociais singulares que inflúen directamente na calidade e características deste produto.
O feito de que se trate dunha zona de orografía accidentada, con acusados contrastes de altitude e que dispoña dun clima de montaña, determina o asentamento en núcleos poboacionais illados e dispersos, que crea a necesidade de aprovisionarse de produtos cárnicos non perecedoiros para dispor deste tipo de alimento durante todo o ano.
Tamén é de destacar a presenza de extensos bosques de caducifolias nesta zona, abastecedores de leña de carballo (Quercus robur L.) coa que tradicionalmente se afuman estes embutidos.
O clima oceánico de montaña que caracteriza este territorio presenta invernos fríos e ventosos, condicións que, historicamente, favoreceron o curado natural dos embutidos.
5.2 Carácter específico do produto:
A Androlla de Galicia é un produto típico da montaña luguesa e ourensá, e a súa popularidade e tradición culinaria destacan en diversas obras e publicacións gastronómicas e culturais.
A especificidade deste produto radica na utilización como materias primas de produtos non habituais na elaboración doutro tipo de elaborados cárnicos, como a costela e os coiros; a utilización no embutido de intestino groso de porcino ou vacún; e a afumadura con leña de carballo; aspectos que lle confiren características físicas e organolépticas non presentes noutro tipo produtos de similar natureza.
5.3 Relación causal entre a zona xeográfica e a calidade, a reputación ou outras características específicas do produto.
A orografía e o clima que caracterizan o territorio de elaboración da Androlla de Galicia, determinan a existencia dunha poboación diseminada e illada, que recorre ao autoconsumo para a alimentación diaria e a conservación da carne de porco mediante diferentes procesos. Os seus invernos fríos e ventosos propiciaron a especialización deste territorio na produción destes embutidos. Para corrixir os problemas que a humidade ambiental provoca no proceso de curado, o saber facer tradicional dos produtores da zona derivou na realización dun proceso previo de afumadura, para o que se utiliza leña de carballo (Quercus robur L.), especie abundante na área de elaboración da androlla.
En definitiva, as particulares condicións da área xeográfica deron lugar a un saber facer tradicional dos paisanos, que perfeccionaron a técnica de elaboración, transmitíndoa de pais a fillos. Todo iso determina a orixinalidade, calidade e prestixio deste produto.
