O Decreto 64/2006, do 6 de abril, coas modificacións do Decreto 38/2007, do 1 de marzo, regula e establece as bases do réxime de subvencións para o remate exterior de vivendas unifamiliares rurais de nova construción.

A disposición derradeira primeira do citado Decreto 64/2006, que regula o réxime de subvencións para o remate exterior de vivendas unifamiliares rurais de nova construción, outórgalle á conselleira de Vivenda e Solo, no marco das súas competencias, a potestade de ditar as disposicións necesarias para o desenvolvemento e a súa aplicación.

A Orde do 9 de abril de 2008 convocaba as subvencións para o citado ano e estableceu unhas bases reguladoras con vixencia indefinida.

Esta orde, convoca as subvencións para o exercicio 2009, indica o seu importe máximo e a partida orzamentaria en que figuran os créditos que amparan esta orde.

En virtude do exposto anteriormente, e en uso das facultades que teño atribuídas pola Lei 1/1983, do 22 de febreiro, de normas reguladoras da Xunta e a súa Presidencia, modificada pola Lei 11/1988 e pola disposición adicional 8.1º da Lei 2/2007, do 28 de marzo e desenvolvida polo Decreto 211/2005, do 3 de agosto, e o Decreto 505/2005, do 22 de setembro, polo que se establece a estrutura orgánica da consellería de Vivenda e Solo,

DISPOÑO:

Artigo 1º.-Obxecto.

Abrir a convocatoria no exercicio económico de 2009, nun procedemento de concorrencia non competitiva, para as subvencións reguladas no Decreto 64/2006, do 6 de abril, DOG nº 79, do 25 de abril, e na Orde de bases do 9 de abril de 2008, (DOG nº 74, do 17 de abril) destinadas ás persoas físicas promotoras de vivendas unifamiliares rurais, con baixos ingresos, para que poidan rematar os exteriores das súas casas, e así queden protexidas da humidade e o clima en condicións de salubridade e seguranza, adecuadas ao medio e á paisaxe e respectuosas coa tipoloxía tradicional da zona.

Artigo 2º.-Cómputo dos ingresos familiares.

Para os efectos do determinado no artigo 7º do Decreto 64/2006, do 6 de abril, computaranse os ingresos da base impoñible xeral e do aforro, reguladas nos artigos 48 e 49 respectivamente , da Lei 35/ 2006, do 28 de novembro, reguladora do imposto sobre a renda das persoas físicas, incrementada se é o caso, no importe que resulte do establecido no artigo 20, números 2º e 3º, da citada lei, correspondente á declaración ou declaracións presentadas por cada un dos membros da unidade familiar relativa ao período impositivo inmediatamente anterior, con prazo de presentación vencido, á solicitude da subvención.

Artigo 3º.-Prazo de presentación de solicitudes.

Para os efectos do disposto no artigo 9 do Decreto 64/2006, o prazo de presentación de solicitudes comezará o día da entrada en vigor desta disposición e rematará o 1 de xuño de 2009.

Artigo 4º.-Modelo de solicitude.

De acordo co establecido no artigo 4 da Orde do 17 de abril de 2008, o modelo de presentación de solicitudes é o que figura como anexo á presente orde.

Artigo 5º.-Importe máximo e dotación orzamentaria.

Para os efectos do determinado no artigo 6 do Decreto 64/2006, o importe máximo destas axudas será de 212.765 euros, e instrumentaranse financeiramente a través do crédito que figura consignado na aplicación 17.02.451B.780.0 do vixente orzamento de gastos da Consellería de Vivenda e Solo.

Disposición derradeira

Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 23 de febreiro de 2009.

Teresa Táboas Veleiro

Conselleira de Vivenda e Solo

Ver referencia pdf "04300D014P077.PDF"