Por acordo do Pleno do Concello, en sesión ordinaria do 19 de novembro de 2009, aprobouse definitivamente o Plan de sectorización, previsto no vixente Plan Xeral de Ordenación Municipal, do SUND-5, Madeireira de Dozar, no lugar da Silva de Arriba da parroquia de San Miguel de Sarandón, promovido por Celestino Lata Carbia, e nos termos do expediente tramitado, o que se publica para os efectos do artigo 92.2º da Lei 9/2002, do 30 de decembro, de ordenación urbanística e protección do medio rural de Galicia.

En cumprimento do disposto no artigo 92.3º da mencionada Lei 9/2002, do 30 de decembro, remitíronse á consellería competente en materia de urbanismo e ordenación do territorio dous exemplares do plan de sectorización aprobado definitivamente con todos os planos e documentos que o integran, debidamente dilixenciados polo secretario do concello.

Así mesmo, de acordo co sinalado no artigo 92.2º da citada lei, publicarase no BOP da Coruña o documento que contén a normativa e as ordenanzas.

Contra o acordo de aprobación definitiva, en aplicación do artigo 107.3º da Lei 30/1992, do 26 de novembro, de réxime xurídico das administracións públicas e do procedemento administrativo común, poderá interpoñerse recurso contencioso-administrativo, diante da Sala do Contencioso-Administrativo do Tribunal Superior de Xustiza de Galicia, no prazo de dous meses contados desde a publicación do presente anuncio, de conformidade co artigo 46 da Lei 29/1998, do 13 de xullo, da xurisdición contencioso-administrativa. Todo iso sen prexuízo de que se poida interpoñer calquera outro recurso que se puidese estimar máis conveniente.

Vedra, 24 de novembro de 2009.

Odón C. Cobas García

Alcalde