O Concello de Ourol considerou conveniente organizar correctamente o seu emblema municipal para perpetualo coa simboloxía adecuada e conforme as normas da heráldica. Para iso, e de acordo coas facultades que lle confiren as disposicións legais vixentes, elevou o informe histórico-heráldico, coa correspondente proposta de representación gráfica da bandeira, para a aprobación definitiva desta.
A competencia exclusiva en materia de adopción, modificación ou rehabilitación dos emblemas heráldicos dos concellos e doutras entidades locais correspóndelle á Comunidade Autónoma galega, segundo o disposto polo artigo 27.2º do Estatuto de autonomía de Galicia.
O expediente tramitouse conforme as normas de procedemento establecidas na Lei 7/1985, do 2 de abril, reguladora das bases de réxime local; Lei 5/1997, do 22 de xullo, de Administración local de Galicia; no Decreto 19/2010, do 11 de febreiro, polo que se aproba o regulamento de símbolos das entidades locais de Galicia, e no Regulamento de organización, funcionamento e réxime xurídico das corporacións locais, aprobado polo Real decreto 2568/1986, do 10 de decembro.
Na súa virtude, visto o informe emitido pola Comisión de Heráldica da Xunta de Galicia e por proposta da persoa titular da Consellería de Presidencia, Administracións Públicas e Xustiza, e logo de deliberación do Consello da Xunta de Galicia na súa reunión do día nove de setembro de dous mil dez,
DISPOÑO:
Artigo único-.Aprobar a bandeira do Concello de Ourol, que figura como anexo, organizada do seguinte xeito:
En pano de verde unha banda de amarelo acompañada dun «vichelocrego» ou «gaimarelo» (Oriolus Oriolus) de amarelo e ás de negro en cada oco.
As aves de amarelo Oriolus oriolus, coñecidas en Galicia como vichelocrego e gaimarelo, simbolizan o topónimo Ourol, derivado do latín Aureolus (dourado) e a propia ave. A banda engolada lembra o cabaleiro don Fernán Pérez de Andrade «o boo», que deixou a súa pegada heráldica o século XIV na igrexa parroquial de San Pantaleón de Cabanas e que el mesmo mandou edificar; e a cor verde do campo simboliza o ambiente e o seu carácter rural.
Santiago de Compostela, nove de setembro de dous mil dez.
Alberto Núñez Feijóo
Presidente
Alfonso Rueda Valenzuela
Conselleiro de Presidencia, Administracións Públicas e Xustiza
Ver referencia pdf "18800D005P009.PDF"