Uns 400 voluntarios galegos reuníronse esta mañá na sede da Academia Galega de Seguridade Pública (Agasp), na Estrada, para participar nun acto de recoñecemento ás agrupacións e asociacións de voluntariados de protección civil, así como ás institucións e personalidades que colaboran con elas.

O vicepresidente da Xunta, Alfonso Rueda, participou hoxe neste evento, no que tamén estivo presente o presidente da ANAV, Arturo Fuente, e o delegado do Goberno en Galicia, Santiago Villanueva, que recibiu a Cruz de Servizos Distinguidos, na categoría de ouro, pola súa colaboración coas agrupacións de protección civil.

O acto, que cada ano se celebra en lugares distintos da xeografía nacional, pretende dar visibilidade e recoñecer os méritos acadados no campo da protección civil. Deste xeito, ademais da condecoración ao delegado do Goberno, entregáronse placas ao mérito colectivo -nas categorías de ouro, prata e bronce- a distintas asociacións de protección civil Ademais, tamén se fixo entrega da Cruz de Servizos Distinguidos na categoría de bronce a varios voluntarios e, de maneira especial, a 11 voluntarios a título póstumo.

Este ano, coincidindo co 15º aniversario da catástrofe do Prestige, a ANAV presentou oficialmente a Medalla Prestige, que ten como finalidade poñer en valor a solidariedade e os servizos prestados por todas as persoas que, ben voluntariamente ou pertencendo a outras institucións, participaron activamente para paliar as consecuencias desta situación. A medalla número 0 entregouse á S. M. o Rei Don Juan Carlos I de Borbón e a número 1 á Brigada de Infantería Lixeira Aero-Transportable (Brilat), con base en Figueirido (Pontevedra), e que estivo presente durante os meses que duraron os labores de limpeza nas costas galegas.