A Xunta cita o vindeiro mes aos titulares dos terreos afectados polas obras de acceso ao polígono de Areas e á depuradora de Guillarei, en Tui, para o levantamento de actas previas

O 2 e 3 de outubro será a quenda para os propietarios de fincas afectadas polas obras de Areas, que asistirán ao Concello de Tui, entre as 09: 30 e as 13:30

Este semienlace complementa a ligazón prevista entre a A-55 e a VAP Tui-A Guarda e conectará o polígono coas vías de alta capacidade, atendendo á demanda de veciños e usuarios na mellora das conexións desta zona industrial

O 10 de outubro deberán acudir á casa consistorial de Tui, entre as 9 e as 14 horas, os propietarios de terreos afectados pola execución da rotonda de acceso á Edar de Guillarei

Esta intervención, en proceso de adxudicación, ten por obxecto a mellora da intersección existente no punto quilométrico 1+900 da estrada PO-404, pola que se accede á depuradora e á praia fluvial, mediante a execución dunha glorieta

Santiago de Compostela, 22 de setembro de 2018
Compartir
  • whatsapp

A Xunta vén de convocar no vindeiro mes de outubro aos propietarios dos terreos afectados polas obras de acceso ao polígono de Areas e á depuradora de Guillarei, en Tui, para o levantamento de actas previas.

O Goberno galego cita para os vindeiros días 2 e 3 de outubro aos propietarios dos terreos afectados pola execución do semienlace de acceso ao polígono industrial de Areas-Tui, desde a Vía de Altas Prestacións, Tui –A Guarda.

Os interesados deberán acudir á casa consistorial de Tui, entre as 09:30 e as 13:30 horas. O día 2 de outubro emprázase aos propietarios cuxos apelidos van da letra A á M, citándose ao resto dos propietarios para o seguinte día 3 de outubro.

Este semienlace complementa á ligazón prevista entre a A-55 e a VAP Tui- A Guarda, conectando directamente o polígono de Areas con estas vías de alta capacidade, atendendo á demanda dos veciños e usuarios do polígono de mellora das conexións desta zona industrial. A Xunta está a ultimar a redacción do proxecto que integra o semienlace de Areas no proxecto completo do enlace entre a A-55 e a vía de alta capacidade Tui -A Guarda.

Rotonda en Guillarei

Por outra parte, a Xunta tamén vén de convocar para o 10 de outubro aos titulares de fincas afectadas pola construción da rotonda de acceso á estación depuradora de Guillarei, na estrada PO-404, en Tui.

Os afectados deberán acudir á casa consistorial no horario comprendido entre as 9 e as 14 horas do día indicado.

A intervención proxectada ten por obxecto a mellora da intersección existente no núcleo de Guillarei, no punto quilométrico 1+900 da estrada de titularidade autonómica, pola que se accede á depuradora e á praia fluvial, mediante a execución dunha glorieta.

Estas obras xa están en proceso de adxudicación, que vai en paralelo á expropiación.