Santiago de Compostela, 31 de xullo de 2024

O director xeral de Comercio e Consumo, Gabriel Alén, participou hoxe no acto de entrega de premios da campaña Merca e Gaña 2024, organizada pola Asociación Comercio Punto Compostela. Alí, puxo en valor o papel dos centros comerciais abertos, aos que neste 2024 a Xunta destina 2,25 millóns de euros en axudas para avanzar na súa innovación e dinamización.

Con estas achegas que se atopan en fase de resolución, subliñou o director xeral, o Executivo autonómico busca promover a revitalización do comercio local como elemento esencial do desenvolvemento económico e social das vilas e cidades galegas.

En concreto, trátase de apoios cos que se financian custos de xerencia e gastos de actividades e que tamén van dirixidos a mellorar a fidelización e a dixitalización con medidas como bonificacións para aparcar a través dos tikects de compra ou a través da creación e mantemento de marketplaces, páxinas web ou mupis e sinalización dixital, entre outros.

Aposta polo comercio local

Estas axudas enmárcanse na aposta do Goberno galego polo comercio local, como vertebrador do territorio e xerador de riqueza e emprego. Nesa liña, estase a perfilar un Plan de remuda xeracional no comercio, con proxectos piloto nas cabeceiras de comarca que atendan ás necesidades de cada contorna e á análise de sincronización da oferta e da demanda. 

A maiores, avógase pola revitalización dos centros comerciais abertos, así como pola dos recintos destinados ás feiras. Todo isto converxe no Plan estratéxico do comercio galego que se está elaborando cos implicados, unha planificación en materia de transformación dixital, innovación e modernización do sector comercial e tamén artesanal, que permita desenvolver un Mapa do Comercio de Galicia efectivo.