Santiago de Compostela, 10 de setembro de 2024

A Xunta de Galicia valorou as iniciativas pioneiras que puxo en marcha para consolidar a Comunidade como referente na loita contra o cambio climático e avanzar cara á redución de emisións.

Así o subliñou a directora xeral de Enerxías Renovables e Cambio Climático, Paula Uría, na inauguración da xornada O camiño á neutralidade climática: Reflexións desde Galicia e Europa, organizada por ECOBAS, que foi clausurada polo secretario xeral da Oficina de Coordinación Económica da Presidencia, Juan Carlos Reboredo, e na que tamén participou o director da Axencia Galega da Industria Forestal (XERA), Jacobo Aboal.

Logo de incidir en que Galicia é un exemplo de sostibilidade e de responsabilidade ambiental grazas ás medidas implementadas para reforzar a Comunidade como un refuxio climático verde e sostible, Paula Uría lembrou que a Xunta está a traballar na actualización da Estratexia galega de cambio climático e enerxía 2050 (EGCCE 2050), que é a folla de ruta da Comunidade para acadar a neutralidade climática, coa elaboración do novo Plan rexional integrado de clima e enerxía 2024-2030.

Segundo dixo a directora xeral, as prioridades deste plan serán afondar na mitigación das emisións, apostar pola protección da biodiversidade e do patrimonio natural e dar un pulo ás medidas orientadas a reducir o impacto do cambio climático na saúde. A maiores, Uría subliñou tamén a aposta do Goberno galego por reforzar “a dimensión social, a gobernanza e a sensibilización” para acadar unha sociedade formada, concienciada e resiliente ante este fenómeno.

Así, a Xunta promoveu en 2022 a Alianza galega polo clima, que conta xa con preto de 150 entidades adheridas -universidades, autoridades portuarias, clubs deportivos ou empresas-, co obxectivo de conectar ao tecido produtivo e social galego de cara a traballar contra o cambio climático, facer máis resiliente á Comunidade e establecer pautas de actuación para alcanzar unha Galicia neutra en emisións.

E, no que atinxe á colaboración administrativa, a Xunta presentou o pasado mes de maio a Rede local polo clima, de cara a coordinar cos concellos as actuacións para aproveitar sinerxías na loita contra o quecemento global e, ao mesmo tempo, promover políticas locais de sustentabilidade ambiental, facilitando a xestión do coñecemento así como a difusión e intercambio de experiencias.

Esta medida complementa o traballo desenvolvido a través do Pacto das Alcaldías polo Clima e a Enerxía, que conta xa con 285 concellos adheridos, dos que preto do 92% xa elaboraron o correspondente Plan de acción para o clima e a enerxía sustentable (PACES), que son follas de ruta fundamentais de cara a mellorar a eficiencia enerxética, utilizar fontes de enerxía renovables, aumentar a resiliencia e reducir as emisións de CO₂.

Nesa liña de seguir avanzando cara a un novo modelo produtivo máis sostible e eficiente, o Goberno galego está a preparar a futura Lei de administración ambiental simplificada. Así, a futura normativa pretende reforzar a seguridade xurídica dos proxectos para garantir o imprescindible equilibrio entre o desenvolvemento das distintas iniciativas e a protección do medio natural así como unificar e actualizar a regulación nesta materia e adaptar a normativa europea aos novos retos climáticos.

A maiores, a directora xeral avogou por respectar as competencias de cada administración e evitar as inxerencias externas que poden distorsionar o debate nun tema tan complexo e sensible como o medioambiental.

Pola súa banda, o secretario xeral da Oficina de Coordinación Económica da Presidencia, Juan Carlos Reboredo, destacou os investimentos estratéxicos que promove o Goberno galego para aproveitar as vantaxes competitivas da transición enerxética. Estes investimentos céntranse en eidos como o eólico, o biogás, a descarbonización de polígonos industrias e os portos, o hidróxeno verde, a hidroeléctrica reversible ou os minerais estratéxicos.

Reboredo puxo en valor o traballo da Administración autonómica en consonancia co Pacto Verde Europeo, e o desenvolvemento de diferentes accións orientadas á absorción de CO₂.

Créditos de carbono

Por outra banda, na mesa-coloquio Políticas para mudar o rumbo, o director da director da Axencia Galega da Industria Forestal (XERA), Jacobo Aboal, destacou o impulso da Xunta na absorción de gases de efecto invernadoiro coa creación do seu Sistema de créditos de carbono. A súa tramitación, encadrada na nova Lei de promoción dos beneficios sociais e económicos dos proxectos que utilizan recursos naturais de Galicia, permitirá a activación dos mercados voluntarios dirixidos tanto a organizacións públicas e privadas como á propia cidadanía.

Durante a súa intervención, Aboal sinalou que a comunidade galega xa é un referente na descarbonización, xa que unha de cada catro toneladas das absorcións de carbono que declara o Goberno de España nas terras forestais proveñen de Galicia. Dos 40 millóns de toneladas de CO₂ equivalente que absorben anualmente os bosques españois, case 10 millóns son achegadas polas masas forestais galegas, cando tan só abranguen un 7% da superficie arborada do Estado.