Declaración institucional da Xunta de Galicia con motivo da conmemoración do 110 aniversario da estrea do Himno Galego
  • whatsapp

A Xunta de Galicia súmase á celebración do cento dez aniversario do Himno Galego, interpretado por vez primeira nas terras da emigración habaneira, orixe así mesmo doutros destacados símbolos do noso pobo, como a súa bandeira ou sociedade promotora da Academia Galega.

O noso himno resoou por vez primeira no Teatro do Centro Gallego da Habana o 20 de decembro de 1907, data na que a comunidade galega en Cuba homenaxeou a Pascual Veiga, autor da música que acompañou o poema “Os pinos” de Eduardo Pondal, convertido a partir de entón en emblemática letra do noso canto comunal.

Dende aquela xornada ata a actualidade, todas as galegas e galegos teñen no himno un símbolo do seu vencello coa comunidade, que espella nos seus sons e versos a querenza pola Terra, a adhesión ao idioma a pertenza ao noso pobo. Por iso, neste cento dez aniversario, a Xunta de Galicia quere lembrar tan sinalada efeméride e congratularse pola conmemoración deste relevante episodio para a Historia de noso.
 

Imaxes relacionadas
Data de actualización: 20/12/2017