A Xunta adxudica a construción de 36 vivendas de promoción pública en Vigo, cun investimento de preto de 4,2 millóns

A construción do edificio da rúa Ignacio Grobas empezará en verán e ten un prazo de 24 meses

Será un bloque composto por soto, baixo andar, catro pisos máis baixo cuberta no que se distribuirán vivendas de 2, 3 e 4 dormitorios, con dúas adaptadas para persoas con mobilidade reducida

A Consellería de Infraestruturas e Vivenda aduxicará tamén proximamente a construción doutras 26 vivendas de promoción pública nas que se investirán preto de 3,4 millóns de euros

A en total, a Xunta iniciará este ano a construción de 62 vivendas de promoción pública en Vigo, cun investimento de máis de 7,5 millóns de euros

Santiago de Compostela, 14 de maio de 2018
  • whatsapp

A Xunta de Galicia investirá case 4,2 millóns de euros en 36 novas vivendas de promoción pública en Vigo, unha vez que o Instituto Galego da Vivenda e Solo adxudicou hoxe as obra de construción das mesmas. Prevese o inicio das obras en verán, cun prazo de execución de 24 meses.

As vivendas emprazaranse na rúa Ignacio Grobas, onde se levantará un edificio composto de soto, baixo andar, catro pisos e baixo cuberta. As vivendas serán de 2, 3 e 4 dormitorios, segundo a seguinte distribución:

• 28 vivendas de 3 dormitorios.
• 4 vivendas de 2 dormitorios
• 4 vivendas de 4 dormitorios

Dúas das vivendas están adaptadas para o seu uso por persoas con mobilidade reducida.

Nos baixos emprazaranse catro locais, cun superficie que supera os 719 metros cadrados, que serán cedidos gratuitamente ao Concello, a cambio da cesión da parcela na que se constrúen as vivendas.

Outras 26 vivendas

A Consellería de Infraestruturas e Vivenda construirá outras 26 vivendas na rúa Chantada, cun investimento previsto de preto de 3,4 millóns de euros.

Esta obra foi licitada no pasado mes de marzo de 2018 e actualmente estase tramitando a súa adxudicación.

Con ambas obras a Xunta iniciará este ano a construción de 62 vivendas de promoción pública en Vigo, cun investimento conxunto de máis de 7,5 millóns de euros.

Imaxes relacionadas
Data de actualización: 14/06/2018