A conselleira de Infraestruturas e Mobilidade participou nun encontro da Comisión Autonómica de Tráfico e Seguridade Viaria, na que lle propuxo ao Goberno estatal un protocolo de colaboración en materia de seguridade viaria para a súa sinatura
Ethel Vázquez solicítalle ao Goberno central a eliminación dos treitos de concentración de accidentes nas estradas estatais do mesmo xeito que a Xunta está realizando nas autonómicas

Vázquez Mourelle indica que a Xunta solicitou esta reunión por mor da evolución dos datos de falecidos nas estradas de Galicia, cun incremento do 30% respecto do ano pasado

Salienta que as administracións teñen que estar ‘atentas e tensas’ ante os accidentes de tráfico

Explica que os primeiros indicios apuntan a que gran parte dos accidentes teñen factores como as distraccións co móbil ou non levar posto o cinto de seguridade, polo que cómpre seguir traballando na concienciación e formación das persoas

Subliña que a Xunta seguirá celebrando campañas de sensibilización en medios e en colexios ou encontros formativos para motociclistas ou policías locais

Sinala que o Goberno galego se compromete a manter e amplificar as actuacións previstas no Plan de Seguridade Viaria de Galicia, como a construción de sendas peonís ou a eliminación dos treitos de concentración de accidentes

A Xunta solicitoulle ao Goberno central que sigan colaborando no reparto de chalecos ou cortaventos reflectantes a peóns e ciclistas, que identifiquen puntos da súa rede que necesiten melloras ou que reforcen a seguridade dos peregrinos
 

A Coruña, 7 de novembro de 2018
  • whatsapp

A conselleira de Infraestruturas e Mobilidade, Ethel Vázquez, xunto co director da Axencia Galega de Infraestruturas, Francisco Menéndez, participou hoxe nun encontro da Comisión Autonómica de Tráfico e Seguridade Viaria, na que lle solicitou ao Goberno central que actúen nas estradas estatais para eliminar os tramos de concentración de accidentes do mesmo xeito que o está realizando a Xunta nas vías da súa titularidade.

Nesta reunión, entre representantes da Administración Xeral do Estado, Xunta e Administracións locais, o Goberno galego propuxo un borrador de protocolo de colaboración en materia de seguridade viaria para a súa posterior sinatura.

Cómpre lembrar que a Xunta, co gallo dos últimos datos de falecidos nas estradas de Galicia, que amosan un incremento no contorno do 30% respecto do ano pasado, solicitou a celebración deste encontro. A este respecto, a conselleira manifestou que as administracións teñen que estar ‘atentas e tensas’ ante os accidentes de tráfico.

Os datos avaliados apuntan a que gran parte destes accidentes teñen factores como as distraccións co móbil e non levar posto o cinto de seguridade. Nese sentido, a conselleira destacou a necesidade de seguir traballando na concienciación e formación das persoas.

A titular de Infraestruturas subliñou que a Xunta seguirá celebrando campañas de sensibilización en medios de comunicación e en colexios ou encontros formativos para motociclistas e para policías locais. Nesta liña, solicitou ao Goberno central o mantemento das colaboracións en accións como o reparto de chalecos reflectantes que fabrica a Xunta.

Sinalou que o Goberno galego se compromete a manter e amplificar as accións en marcha e previstas no Plan de Seguridade Viaria de Galicia, actuando sobre as estradas coa construción de sendas peonís ou a eliminación dos treitos de concentración de accidentes.

Engadiu outras actuacións que a Xunta seguirá levando a cabo, como os plans de conservación ordinaria e extraordinaria para manter a rede viaria en condicións axeitadas ou a adquisición de máis elementos reflectantes para peóns e ciclistas.

No marco desta coordinación entre administracións e co fin de reforzar a seguridade, o Goberno galego tamén lle demandou ao central que identifiquen treitos da súa rede que necesiten melloras ou que incrementen a seguridade dos peregrinos con sinalización e coas obras necesarias.

Imaxes relacionadas
Data de actualización: 07/11/2018