Galicia é a segunda comunidade na que máis baixa o paro na evolución anual cunha caída do 8,98% no último ano

A secretaria xeral de Emprego, Covadonga Toca, valorou hoxe os datos de novembro destacando a boa evolución, xa que o desemprego cae en 16.806 persoas, mentres que se incrementan as afiliacións e sobe a contratación indefinida e a tempo completo

O descenso do paro é maior na Comunidade galega que en España con máis de dous puntos e medio de diferencia

As afiliacións levan seis meses superando a barreira do millón cun aumento con respecto a novembro de 2017 dun 2,09%, a maior subida desde 2007

O aumento da contratación indefinida nun 20,94% quintuplica o incremento rexistrado na temporal, e con respecto ao Estado o ritmo de subida en Galicia é maior en 5,2 puntos

Toca puxo en valor o traballo da Administración autonómica para favorecer a creación de emprego lembrando que Orzamento para 2019 conta con 255,5 millóns de euros –un 7% máis que en 2018- para impulsar o traballo e a formación axustada ás necesidades do emprego que vén

Santiago de Compostela, 4 de decembro de 2018
  • whatsapp

A secretaria xeral de Emprego, Covadonga Toca, valorou hoxe nunha visita que desenvolveu á empresa Intera en Santiago os datos do paro rexistrado salientando a boa evolución do desemprego en Galicia: a Comunidade conta con 16.806 parados menos que hai un ano, o que supón unha baixada do 8,98%, superando en case un punto o descenso acadado en novembro de 2017. En palabras de Toca, estes datos reflicten que a Comunidade galega conta cunha estabilidade, o que se traduce en máis e mellores empregos.

Galicia, deste xeito, posiciónase como a segunda comunidade na que máis baixa o paro na evolución anual superando, ademais, o ritmo de baixada da media estatal en máis de dous puntos e medio de diferencia. En España a caída no número de persoas sen emprego sitúase no -6,37%.

Son xa cinco anos de baixadas consecutivas do paro, desde novembro de 2013, e os niveis de desemprego son inferiores ao dato de 2008, o ano de inicio da crise, subliñou a secretaria xeral, sinalando que é preciso seguir traballando na mesma dirección impulsando un crecemento económico sustentable con políticas activas de emprego centradas nunha formación axustada ás necesidades do emprego que vén.

As cifras tamén experimentan unha boa evolución nas afiliacións e na contratación. Galicia leva seis meses rexistrando máis dun millón de afiliacións, desde xuño pasado. Con respecto a hai un ano, as cotizacións subiron nun 2,09%, o que supón 20.714 novas afiliacións. É a maior subida desde 2007 e son xa máis de catro anos e medio de incrementos consecutivos nas afiliacións, desde abril de 2014.

Con respecto á contratación, no último ano, subiu en xeral nun 5,5% medrando a indefinida e a tempo completo. Os contratos indefinidos aumentaron un 20,94%, quintuplicando o aumento da temporal, e a tempo completo subiron un 5,04%, superando en dous puntos o incremento da parcial. Con respecto ao Estado, os contratos increméntanse en xeral máis en Galicia que no Estado cun diferencial de 2,81 puntos e a subida nos indefinidos tamén é maior en Galicia que en España en 5,2 puntos .

O desemprego, ademais, tamén baixou na evolución anual nos colectivos prioritarios para a Xunta: os menores de 30 anos (-11,91%); parados de longa duración (-11,05%); e mulleres (-8,01%). Así mesmo, descendeu nas catro provincias galegas e sete grandes cidades e en todos os sectores de actividade liderando a caída a construción (-17,72%), seguido da industria (-12,01%), dos servizos (-7,26%) e da agricultura e a pesca (-6,1%).

Con respecto ao dato provincial, lidera a caída do paro Pontevedra (-9,72%), seguida da Coruña (-9,38%), de Lugo (-9,25%) e de Ourense (-4,59%).

Menos paro na industria

Na evolución mensual, o paro increméntase en novembro un 0,37% con respecto a outubro sendo o segundo menor incremento de toda a serie histórica. Os datos compórtanse mellor que nos últimos anos en novembro. Pese ao aumento rexistrado este mes, o desemprego baixou na industria, principalmente en actividades vinculadas á alimentación, fabricación de produtos farmacéuticos e as TIC, entre as mulleres- en especial entre as mozas-, na provincia de Ourense e nas cidades de Ourense, A Coruña, Lugo e Pontevedra.

A secretaria xeral de Emprego puxo en valor o traballo da Administración autonómica para favorecer o emprego en Galicia lembrando que os orzamentos de 2019 contan con 255,5 millóns de euros para o emprego e a formación, un 7% máis que o pasado exercicio para continuar impulsando a estabilidade laboral e dotar á Comunidade de máis e mellores postos de traballo.

Visita

A secretaria xeral de Emprego valorou os datos de paro de novembro nunha visita que desenvolveu á empresa Intera, unha compañía de base tecnolóxica (IEBT) que colabora co Laboratorio de Análise de Radiacións da Universidade de Santiago de Compostela que busca ofrecer as mellores solucións para a mitigación do gas radón. O obxectivo é facilitar a transferencia dos resultados das investigacións á sociedade e ao tecido produtivo

Imaxes relacionadas
Data de actualización: 04/12/2018