Na Gala da Vela Galega celebrada na sede Afundación da Coruña e na que se entregaron unha corentena de premios
José Ramón Lete Lasa: "Nos 25 anos que van do Galicia 93 de Javier de la Gándara ao Mapfre do RCN de Sanxenxo transcorren os fitos máis importantes da historia dourada da vela galega"

Destaca as catro medallas olímpicas de vela coas que conta Galicia, os dez deportistas galegos que competiron en Xogos Olímpicos, as 2.000 licenzas federativas e os 63 clubs, os 29 deportistas galegos de alto nivel e os 44 deportistas de alto nivel ou os 22 podios internacionais en Campionatos de Europa e do Mundo acadados por regatistas galegos entre 2017 e 2018

A Coruña, 15 de marzo de 2019

O secretario xeral para o Deporte, José Ramón Lete Lasa, asistiu hoxe a Gala da Vela Galega que tivo lugar na sede Afundación da Coruña e na que destacou dous dos fitos máis importantes da historia deste deporte en Galicia como o terceiro posto do Galicia 93 Pescanova na Volta ao Mundo 93-94 e o subcampionato do Mapfre na Volvo Ocean Race 2018. “Entre o Galicia 93 de Javier de la Gándara e o Mapfre do Real Club Náutico de Sanxenxo, neses 25 anos, transcorren os fitos máis importantes da historia dourada da vela galega”, sentenciou.

O responsable do Deporte galego, identificou a xesta do Galicia 93 Pescanova, que deu a volta ao mundo en 122 días, 6 horas e 12 minutos e que contaba co patrocinio do Xacobeo, como unha fazaña sen precedentes que “foi recibida o 8 de xuño do 94 en Vigo por unha multitude de embarcacións e centos de seguidores baixo os acordes do himno galego”. No caso do subcampionato do Mapfre, valorou “o mellor resultado dun veleiro español na historia” e a importancia da muller no deporte, claramente demostrado por Támara Echegoyen, “primeira española en completar a Volvo Ocean Race”.

Como fitos máis destacables destes últimos 25 anos, o mandatario galego destacou as catro medallas olímpicas de vela coas que conta Galicia (Fernando Echavarri e Antón Paz en Pekín 2008 e Támara Echegoyen e Sofía Toro en Londres 2012); os dez deportistas galegos que competiron en Xogos Olímpicos, sendo a vela a cuarta disciplina con maior participación galega; as 2.000 licenzas federativas e os 63 clubs que sitúan a Galicia como a cuarta e a terceira comunidade, respectivamente; os 29 deportistas galegos de alto nivel e os 44 deportistas de alto nivel, sendo Galicia a primeira comunidade de España nesta clasificación; os 22 podios internacionais en Campionatos de Europa e do Mundo acadados por regatistas galegos entre 2017 e 2018 ou os preto de 40 premios entregados hoxe na Gala celebrada hoxe.

O secretario xeral mirou ao futuro con optimismo ao destacar que Galicia conta cunha “irrepetible xeración de mozos e mozas que a súa temperá idade xa son recoñecidos como os mellores en todo o mundo”.

Data de actualización: 15/03/2019