O comercio galego celebra ata o 26 de maio unha nova edición dos 'Días azuis' para dinamizar a súa actividade

A directora xeral de Comercio e Consumo, Sol Vázquez, presentou esta mañá en Vigo esta campaña na que a Xunta participa xunto coa Federación Galega de Comercio e Abanca

As persoas que merquen no comercio de proximidade galego nestas datas poderán participar no sorteo de 80 tarxetas prepago de 300 e 150 euros para mercar novamente nestes establecementos

Co obxectivo de dinamizar e impulsar o comercio de proximidade, a Xunta vén de presentar Comercio 360

Vigo, 15 de maio de 2019

A directora xeral de Comercio e Consumo, Sol Vázquez, presentou esta mañá en Vigo unha nova edición da campaña Días azuis do comercio galego, organizada pola Federación Galega de Comercio, Abanca e a Xunta, e que se celebra ata o 26 de maio co obxectivo de dinamizar o comercio de proximidade.

Na súa intervención, a directora xeral destacou que durante estas dúas semanas o obxectivo da campaña é visibilizar os establecementos que están a pé de rúa e dinamizar o comercio de proximidade, “tan importante para a nosa economía”. Neste sentido, animou aos galegos e galegas a comprar, gozar e apoiar a actividade deste tipo de locais ao longo de todo o ano.

Os clientes dos comercios que realicen as súas compras nestas datas deberán rexistrar o seu tícket en www.diasazuis.com, ou ben solicitar que a rexistre o propio comerciante. Entre todos os participantes sortearanse un total de 16.200 euros en 80 tarxetas prepago: 28 de 300 euros e 52 de 150 euros, que deberán ser utilizadas polos gañadores nos establecementos tradicionais galegos. O sorteo, ante notario, realizarase o vindeiro 29 de maio.

Comercio 360

A iniciativa enmárcase no Plan estratéxico de impulso ao comercio de Galicia que a Xunta está a desenvolver para reforzar este sector e que contempla un total de 55 accións específicas ata 2020. Nesta aposta pola sector, o Goberno galego vén de presentar Comercio 360, unha iniciativa que pretende mellorar a competitividade do sector a través da dixitalización, a economía circular e o produto local e que contempla medidas como a implantación de laboratorios comerciais ou unha liña de axudas á ecoinnovación.

Esta nova iniciativa, dirixida a pemes de menos de 10 traballadores, ten como obxectivo ofrecer aos establecementos unha folla de ruta para conseguir un comercio diverso, moderno e adaptado ás novas realidades e servizos, o que permitirá dinamizar tamén os centros urbanos das cidades e vilas galegas para facelos máis atractivos aos cidadáns, turistas e visitantes.

Imaxes relacionadas
Data de actualización: 15/05/2019