O Gaiás acolle 'Cidade Rompetiño', un encontro de cultura urbana para xente moza con música e deportes de acción

A Praza Central da Cidade da Cultura de Galicia está a celebrar ao longo de día de hoxe a final do primeiro ‘Campionato oficial de España de Scooter Freestyle’

O programa de oito horas conta con exhibicións de parkour, skate e breakdance no Xardín do Teatro, que se completan con música ao vivo e zona de restauración

Santiago de Compostela, 25 de maio de 2019

A Cidade da Cultura de Galicia está a celebrar durante todo o día de hoxe Cidade Rompetiño, unha xornada de oito horas de música, deporte e cultura urbana, que dá resposta a un alto interese de xente nova que vincula o seu lecer a actividades deportivas como parkour ou skate e estreitamente ligadas á música de estilos hip-hop ou hall-dance. Precisamente, este evento está acoller a final do primeiro Campionato oficial de España de Scooter Freestyle, co que os participantes se clasifican para a proba mundial, prevista para o mes de xullo en Barcelona.

A historia do Scooter Freestyle empeza nos Estados Unidos de América no ano 2000 coa comercialización de patinetes de pregar. Rapidamente, comezaron a modificarse estes patinetes para poder ser empregados nos skateparks. A día de hoxe, é a modalidade de deporte de acción con maior forza dentro do sector. Tras 16 anos da súa creación, esta actividade evidencia unha grande evolución que se asocia a actividades como o skate ou o Bmx. En 2015, celebrouse a ISA World Final, onde asistiron máis de 30.000 persoas no evento LKXA Extreme Barcelona no recinto do Fórum, o que dá unha dimensión do enorme interese que esperta esta actividade urbana.

Cidade Rompetiño supón que Galicia sexa anfitrioa, por vez primeira, dun evento destas características e que implica, á vez, ter a oportunidade de acoller a primeira final do Campionato Nacional de carácter oficial, que se celebrará ao aire libre na Praza Central da Cidade da Cultura e no que están a participar medio cento de mozos de toda España. Trátase, por tanto, dunha proba moi importante e de gran relevancia neste deporte urbano.

A Cidade da Cultura de Galicia organiza este encontro xunto a Rompiente Clothing e conta coa colaboración da Real Federación Española de Patinaje. Estes promotores realizaron por vez primeira en Porto do Son, o pasado ano, un festival de cultura urbana de similares características a Cidade Rompetiño durante tres días, coa asistencia de 15.000 persoas. Un éxito que os leva a repetir este mesmo ano no mes de xullo nesa vila do Barbanza, á vez que a organizar este encontro en Santiago de Compostela para arroupar a celebración no complexo do Gaiás da primeira final do Campionato oficial de España de Scooter Freestyle.

Demostracións de parkour, breakdance e zona de restauración

O recentemente inaugurado Xardín do Teatro está a ser escenario durante o día de hoxe de moitas das actividades de Cidade Rompetiño. Este novo espazo verde, de 11.574 metros cadrados, conta con especies botánicas procedentes de diferentes partes do mundo, un auditorio ao aire libre, estanques, instalacións para practicar deportes urbanos e áreas de lecer para gozar da natureza.

Deste xeito, trátase da zona do Gaiás máis axeitada para festexar un evento como Cidade Rompetiño. En concreto, o Xardín do Teatro está a celebrar o Campionato breakdance coa participación de figuras galegas neste estilo de baile urbano e tamén está a ser o escenario escollido para a exhibición de deportes como parkour, skate e Bmx.

De igual forma, pola tarde vaise organizar Rompetiño Parkour, ideado para os afeccionados con exhibicións e un parkour de obstáculos, cuxo enxeño e técnica supón sempre un abraiante espectáculo visual.

Están a completar a xornada actuacións de música ao vivo e un servizo de restauración, con foodtrucks. Finalmente, ás 21,00 horas e fóra do Gaiás, a Cidade Rompetiño porá punto e final á xornada competitiva e de demostracións deportivas na Sala Malatesta, no centro de Compostela, cunha Batalla de galos entre os rapeiros Lopes, Fusa Nocta e Erin DJ Set.

Imaxes relacionadas
Data de actualización: 25/05/2019