Os emprendedores do coworking de Ourense apostan polas solucións TIC e os servizos personalizados de calidade

O director da Axencia Galega da Industria Forestal (Xera), José Ignacio Lema, participou hoxe en San Cibrao das Viñas na clausura da segunda edición da aceleradora, que apoia a Administración autonómica coa colaboración da Escola de Organización Industrial (EOI)

Salienta que os 16 novos empresarios promoven a valorización dos recursos do territorio, a creatividade e produción sostible

O espazo de aceleración desenvolto no CIS Madeira leva impulsado 33 plans empresariais dos que 14 xa están en marcha, con 22 postos de traballo vinculados

San Cibrao das Viñas (Ourense), 30 de xullo de 2019

O director da Axencia Galega da Industria Forestal (Xera), José Ignacio Lema, salientou hoxe en San Cibrao das Viñas os servizos e axudas que a Consellería de Economía, Emprego e Industria pon a disposición das novas empresas no peche do coworking ourensán, onde os 16 emprendedores participantes da segunda edición presentaron os seus proxectos empresariais despois de completar o proceso de formación e asesoramento.

Os novos empresarios, que desenvolveron 14 iniciativas no espazo de emprendemento que impulsa a Xunta en colaboración coa Escola de Organización Industrial (EOI), optaron por diferentes sectores de actividade como a comercialización e a prestación de servizos de enxeñaría eléctrica; o asesoramento dixital para emprendedores, retornados e estranxeiros; a conservación forestal e de xardíns; servizos de consultaría a empresas, organizacións e particulares en sectores diversos; a alimentación sostible e a restauración creativa.

Durante a súa intervención no demoday, Lema subliñou a importancia de que as ideas innovadoras dos emprendedores adecúen as súas propostas ás novas necesidades personalizadas e especializadas dos novos clientes dos mercados actuais, con oferta de produtos e servizos de alta calidade, así como a decidida aposta pola implantación de tecnoloxías e solucións 4.0, a valorización dos recursos do territorio e a creatividade como panca para a innovación do emprendemento.

Desde o comezo da súa actividade, o coworking desenvolto no CIS Madeira de San Cibrao das Viñas apoiou 33 plans de emprendemento, dos que 14 xa están en marcha. Ademais, estas iniciativas levan asociadas a creación ou mantemento de 22 postos de traballo.

O director de Xera resaltou tamén os instrumentos de apoio que ofrece o Goberno galego para facilitar a posta en marcha e a consolidación temperá dos proxectos dos emprendedores. Así, a través do Igape, poden acceder a programas como o Galicia Emprende, que ten como obxectivo estimular o tecido empresarial galego e fomentar a xeración de emprego mediante a creación e fortalecemento de novas pemes, así como os préstamos directos como os activados no programa de instrumentos financeiros innovadores (IFIs) para financiar os seus investimentos.

A través da última convocatoria do programa Galicia Emprende, do que permanece aberto o prazo de solicitudes, ata o vindeiro 10 de outubro, e do Galicia Rural Emprende, a Consellería de Economía, Emprego e Industria achegará en total axudas por valor de 9 millóns de euros a 200 proxectos de autónomos e emprendedores para mobilizar investimentos que superarán os 24 millóns de euros.

Durante este mes finalizaron tamén as accións de formación e asesoramento nos espazos coworking de Santiago de Compostela, Celanova-Terras de Limia, Costa da Morte, Ferrolterra, Mariña Lucense, Ribeira Sacra, O Salnés e Ourense, nos que no conxunto das actuais edicións, se apoiaron 167 iniciativas de emprendemento.

Con esta rede de aceleradoras, a Xunta favorece o desenvolvemento e consolidación de proxectos empresariais e a creación de emprego sobre o territorio, e conta co cofinanciamento do Fondo Social Europeo (FSE). Durante os catro anos que leva en marcha, leva apoiado a máis de 700 emprendedores e un total de 641 proxectos en toda Galicia.

A aposta polo impulso e consolidación de novas empresas materialízase na plataforma StartIN, que ofrece axuda integral ao emprendemento en todo o territorio e que nos últimos cinco anos apoiou máis de 1000 proxectos. Esta iniciativa desenvolve tamén as business factories dos sectores da alimentación (BFFood), a automoción (BFAuto), a aeronáutica (BFAero), a biotecnoloxía (Bioincubatech) ou Agrobiotech (centrada nos eidos agroalimentario, a biotecnoloxía e a biomasa).

Imaxes relacionadas
Data de actualización: 30/07/2019