A conselleira de Política Social, Fabiola García, asinou os convenios que permiten a incorporación de 40 novos usuarios
A Xunta de Galicia amplía o programa Xantar na Casa a catro novos concellos

As novas entidades locais adheridas son Foz, Irixoa, Miño e Vilamartín de Valdeorras

Xa son 174 os municipios adheridos a este programa que leva máis de 40.000 comidas mensuais aos domicilios dos seus usuarios

Santiago de Compostela (A Coruña), 31 de xullo de 2019

A conselleira de Política Social, Fabiola García, asinou hoxe os convenios que permiten ampliar e incorporar no programa Xantar na Casa a catro novos concellos: Foz, Irixoa, Miño e Vilamartín de Valdeorras. A suma destes municipios á iniciativa fará posible incrementar en 40 o número de usuarios que reciben todos os días do ano un menú equilibrado.

Fabiola García destacou o esforzo por parte da Xunta de Galicia e dos concellos para que este programa chegue aos nosos maiores, especialmente a aqueles que viven sós. Así, explicou que Xantar na casa, ademais de achegarlles unha dieta equilibrada e de calidade, permite levar a cabo tamén unha labor de vixilancia, posto que os maiores manteñen un contacto regular coas persoas que lle achegan as comidas. A conselleira sinalou que cada concello poderá prestarlle o servizo a dez usuarios de cada municipio.

No que levamos de ano cinco municipios se adheriron ao programa e poderán prestarlle este servizo aos seus maiores. Os concellos que hoxe asinaron o convenio súmanse ao de Ribeira que firmou a súa integración recentemente. Isto supón a incorporación de 54 novos usuarios a este plan, que reparte máis de 40.000 menús mensuais por todo o territorio galego.

O programa Xantar na Casa chega na actualidade a máis de 1.300 persoas e, con estas novas sinaturas, a 174 concellos. O obxectivo da Xunta de Galicia é acadar os 2.000 usuarios. Así mesmo, nas vindeiras datas incorporaranse a este plan os concellos de Moeche, Porto do Son e San Sadurniño.

A conselleira destacou o firme compromiso da Xunta de Galicia cas galegas e galegos de máis idade. Posto que, ademais de ampliar o programa Xantar na Casa, o Goberno galego segue a traballar para poñer en marcha novas iniciativas como as Casas do Maior ou o RedMay e para incrementar e mellorar recursos como o Servizo de Axuda no Fogar ou a teleasistencia.

Imaxes relacionadas
Data de actualización: 31/07/2019