O director xeral de Mobilidade, Ignacio Maestro, participou hoxe en Santiago nunha nova xuntanza de traballo para o impulso conxunto do complexo intermodal
A Xunta preséntalles ao Concello da Coruña e a Adif o deseño da nova estación de autobuses intermodal

O Goberno galego está a ultimar o proxecto básico da nova terminal de autobuses que se integrará na terminal de ferrocarril

O deseño responde aos parámetros pactados entre as tres administracións, despois de que o cambio de criterio do anterior goberno municipal da Coruña obrigase a iniciar de novo os traballos de redacción do proxecto

Na reunión de hoxe, a Xunta e o Concello avanzaron o inicio dos respectivos trámites encamiñados a acadar a viabilidade urbanística tanto da estación de autobuses como dos accesos

Santiago de Compostela, 19 de setembro de 2019

A Xunta presentoulle hoxe ao Concello da Coruña e a Adif o deseño da nova estación de autobuses intermodal que prevé construír de forma integrada na terminal de ferrocarril da cidade. Este foi un dos principais asuntos que centraron a xuntanza de traballo que mantiveron hoxe en Santiago as tres administracións implicadas no impulso conxunto da nova infraestrutura.

Entre outros técnicos, no encontro participaron, en representación da Xunta de Galicia, o director xeral de Mobilidade, Ignacio Maestro, e a directora xeral de Ordenación do Territorio e Urbanismo, Encarnación Rivas. O Concello da Coruña estivo representado polo concelleiro de Urbanismo, Vivenda, Infraestruturas e Mobilidade, Juan Manuel Díaz Villoslada, mentres que, pola banda de Adif asistiu Juan José Llamas, director de proxectos.

No encontro, o Goberno galego informou de que está a ultimar o proxecto básico da nova terminal de autobuses. Durante a exposición do deseño, os representantes de Adif e do Concello comprobaron que este se axusta aos parámetros pactados entre as tres administracións, despois de que o cambio de criterio do anterior goberno municipal da Coruña obrigase a iniciar de novo os traballos de redacción do proxecto.

Na reunión de hoxe, a Xunta e o Concello avanzaron o inicio dos respectivos trámites encamiñados a acadar a viabilidade urbanística tanto da estación de autobuses como dos accesos, de cuxa execución se encargará a Administración local.

Ademais as tres administracións avanzaron nas negociacións encamiñadas a asinar un convenio de colaboración que plasme as responsabilidades e compromisos concretos de cada unha das partes no impulso conxunto da estación intermodal.

Imaxes relacionadas
Data de actualización: 19/09/2019