Díaz Mouteira analiza cos empresarios do polígono de San Cibrao das Viñas liñas de cooperación para favorecer a actividade empresarial

A delegada territorial da Xunta en Ourense mantivo este encontro días previos á celebración da asemblea xeral desta entidade que terá lugar o venres

Acordaron sumar esforzos para atender as demandas dos empresarios deste parque entre as que destaca a súa necesidade de ampliación, dixitalización, transporte ou formación

Ourense, 7 de outubro de 2019

A delegada territorial da Xunta en Ourense, Marisol Díaz Mouteira, mantivo hoxe unha xuntanza co presidente da Asociación de Empresarios do Polígono Industrial de San Cibrao, José Antonio Rodríguez Araújo, e outros membros da xunta directiva. Este encontro desenvólvese días previos á celebración da 40ª asemblea xeral desta entidade, que terá lugar o próximo venres 11 de outubro.

No encontro Díaz Mouteira escoitou as demandas dos empresarios asentados neste parque industrial e xuntos analizaron liñas de cooperación para favorecer a actividade empresarial. Rodríguez Araújo trasladoulle a necesidade de ampliación do solo industrial, a aposta pola formación e dixitalización, amais da conveniencia de mellorar o transporte público, entre outros asuntos.

Díaz Mouteira subliñoulle ao presidente do polígono a aposta decidida do Goberno galego por mellorar e potenciar esta zona industrial, creada hai 53 anos e a máis grande en extensión de Galicia, que constitúe o gran polo industrial da provincia de Ourense.

Canto á formación e dixitalización Marisol Díaz lembrou que a Consellería de Economía, Emprego e Industria activa todos os anos diferentes liñas de axudas destinadas á posta en marcha de cursos e proxectos cuxa finalidade sexa facilitar os investimentos e a creación de emprego, impulsar proxectos da Industria 4.0 e á innovación, así como a mellora da competitividade e a internacionalización do tecido empresarial galego, entre os seus principais obxectivos. A representante do Goberno galego aludiu a que proximamente se resolverá a concesión de accións formativas para desempregados (AFD) que se impartirán en empresas, concellos ou entidades sen ánimo de lucro e que teñen como obxectivo a inserción e reinserción laboral das traballadoras e traballadores desempregados. Ademais, Marisol Díaz trasladoulle a José Antonio Rodríguez as axudas autonómicas existentes para impulsar a dixitalización das pemes.

Entre os retos da asociación empresarial, o seu presidente expuxo a necesidade de ampliación do solo empresarial desta zona industrial que desde hai tempo estuda a Xunta de Galicia e que se prevé resolva en breve.

Nas inquedanzas do empresariado tamén figura unha mellora das liñas de transporte que comunican co polígono industrial. A delegada territorial indicou que nas vindeiras semanas a Consellería de Infraestruturas e Mobilidade coñecerá a proposta de adxudicatario das liñas e a se a súa oferta pode atender as demandas empresariais.
Así mesmo, a representante da Xunta, no encontro, lembrou outras actuacións do Goberno galego neste recinto empresarial co fin de convertelo en polo de atracción de novos investimentos na provincia de Ourense e de toda Galicia, entre as que subliñou as obras da conexión do polígono de San Cibrao das Viñas e a autovía das Rías Baixas.

Imaxes relacionadas
Data de actualización: 07/10/2019