Rosa Quintana acompaña ás mulleres do mar de Galicia na súa concentración en Madrid para dar visibilidade aos seus oficios

A conselleira do Mar enxalza a importancia da muller no sector pesqueiro galego e anima a Anmupesca a seguir con este tipo de iniciativas para dar a coñecer á sociedade a contribución feminina ao mundo do mar

En Galicia traballan na pesca extractiva preto de 500 mulleres, no eido da acuicultura máis de 1.100 e no marisqueo a pé máis de 2.600
 

Madrid, 7 de marzo de 2020

A conselleira do Mar, Rosa Quintana, acompañou hoxe ás mulleres do sector pesqueiro galego que participaron na concentración convocada na praza de Colón para mostrar a toda España as peculiaridades e características das profesións das mulleres do mar. No marco do Día Internacional da Muller, as traballadoras do complexo mar-industria de Galicia e do resto de España -como mariscadoras, percebeiras, redeiras, pescantinas ou biólogas, entre outras- mostran ata as 18,00 horas de hoxe nos Xardíns do Descubrimento os traxes, instrumentos e aparellos que empregan no seu día a día co obxectivo de darlle visibilidade ao seu importante labor e á dureza dos seus oficios.

O acto, que se enmarca nas accións promovidas pola Asociación Nacional de Mulleres da Pesca (Anmupesca), súmase a outras como unha campaña para dar visibilidade ás profesións femininas da pesca a través das redes sociais mediante fotografías de traballadoras durante a súa xornada de traballo.

A conselleira do Mar, que estivo acompañada pola directora xeral de Desenvolvemento Pesqueiro, Susana Rodríguez, enxalzou a importancia da muller no sector pesqueiro galego e animou a Anmupesca a seguir con este tipo de iniciativas para dar a coñecer á sociedade a contribución feminina ao mundo do mar, unha contribución sen a que a cadea mar-industria de Galicia non sería a mesma.

Anmupesca é unha organización sen ánimo de lucro constituída no 2016 en Madrid e desde aquela desenvolve un importante traballo no ámbito do asociacionismo a nivel estatal. Está composta por 31 asociacións de seis comunidades autónomas (Galicia, Principado de Asturias, Cantabria, Comunidade Valenciana, Andalucía e Madrid) e reúnen a máis de 15.000 mulleres ligadas ao mundo do mar en todo o país en asociación.

No caso de Galicia na pesca extractiva traballan preto de 500 mulleres, o que supón algo máis dun 4% do sector e no ámbito da acuicultura, máis de 1.100, é dicir, máis dun 21% do sector, das que de 700 traballan nas bateas. Dentro do marisqueo a pé, o 70% das persoas que se dedican a esta actividade son mulleres, é dicir máis de 2.600.
 

Imaxes relacionadas
Departamento: C. do Mar
Data de actualización: 07/03/2020