Galicia participa na plataforma de promoción da cultura oceánica europea co Centro Tecnolóxico do Mar como membro fundador

O ente dependente da Consellería do Mar aporta a súa experiencia tanto na difusión da ciencia aos sectores marítimos e á comunidade pesqueira como na execución de proxectos neste ámbito

A institución participa na organización dun taller que se celebrará o 24 e o 25 de setembro e no que se definirán as accións a desenvolver en Europa
 

Vigo, 4 de agosto de 2020

O Centro Tecnolóxico do Mar-Fundación Cetmar, dependente da Consellería do Mar, está a participar como membro fundador na plataforma EU4Ocean, que desenvolverá a súa actividade vencellada co Foro Youth4Ocean e a Rede de Escolas Azuis Europeas co obxectivo de conectar e mobilizar esforzos neste eido. O Cetmar aporta nela a súa experiencia na difusión das ciencias do mar ao público en xeral e aos sectores marítimos e comunidades pesqueiras. Ao mesmo tempo, contribuirá a ligar a actividade da plataforma con outros proxectos, promovendo a conexión entre organizacións con actividade neste eido.

A plataforma céntrase en promover a cultura oceánica, a comprensión da influencia do océano sobre a vida das persoas e o impacto das persoas no propio océano e parte da premisa de que unha persoa con cultura oceánica comprende a importancia do océano para a humanidade, pode comunicar sobre a mesma e ten a capacidade de tomar decisións informadas e responsables sobre o medio mariño e os seus recursos.

O Cetmar contribuirá a ligar a actividade da plataforma con investigacións como o proxecto Mates, financiado polo programa ERASMUS+ da Unión Europea, que aborda a mellora de capacidades das industrias marítimas. Neste contexto, promove a cultura oceánica dando visibilidade á achega das tecnoloxías mariñas no mantemento dun océano saudable.

O seu labor tamén permitirá a conexión co proxecto Icono, financiado polo Fondo Europeo Marítimo e de Pesca (FEMP) a través do Programa Preamar da Fundación Biodiversidade, para dar visibilidade aos esforzos das entidades españolas con actividade de divulgación e educativa neste campo.

Tamén se crearán sinerxías con outras iniciativas, como os proxectos CleanAtlantic e Cockles do programa Interreg Área Atlántica, No primeiro deles o Cetmar está a desenvolver materiais e actividades para concienciar sobre o impacto do lixo mariño e promover boas prácticas para reducilo mentres que no caso do Cockles, búscase dar a coñecer todos os beneficios que aporta unha especie natural tan importante como o berberecho.

Paralelamente, a Fundación Cetmar participará e difundirá as actividades da Plataforma EU4Ocean. As primeiras accións terán lugar entre agosto e setembro, como o concurso #YoungOceanWaves: o que o océano significa para min, promovido pola Dirección Xeral de Asuntos Marítimos e Pesca (DG MARE), que anima aos mozos a amosar a súa conexión co océano con vídeos e fotos orixinais.

Así mesmo, e organizado a iniciativa da Comisión Europea, os días 24 e 25 de setembro terá lugar o obradoiro online Deseño da estratexia de Cultura Oceánica en Europa. As sesións interactivas sentarán as bases para organizar accións colectivas nos eidos do océano e o clima, alimentos do océano e océano san e saudable. A inscrición aínda non está aberta pero pódese atopar máis información e o programa do evento neste enlace.

 

Departamento: C. do Mar
Data de actualización: 04/08/2020