A Amtega pon en marcha novas iniciativas para fomentar o talento dixital e a formación dos novos perfís dixitais

Comeza unha nova edición do programa DigiTalent, que presentou esta semana o programa de actividades

Ofrece un ciclo de webinars sobre as novas tendencias tecnolóxicas, que se complementarán con titorías especializadas

Santiago de Compostela, 10 de outubro de 2021
Compartir
  • whatsapp

O Plan para a Promoción do Talento Dixital de Galicia, DigiTalent, inicia o curso cun novo catálogo de actividades que se abordaron esta semana nunha xuntanza de traballo presidida polo director da Área de Sociedade Dixital da Axencia para a Modernización Tecnolóxica de Galicia, Miguel Rodríguez Quelle, e na que tamén se fixo balance das 34 actuacións que se desenvolveron no curso 2020-2021.

O Plan, posto en marcha no 2018, ten por obxectivo reducir a fenda entre a dispoñibilidade de traballadores con competencias dixitais e a crecente demanda destes perfís no mercado laboral a través de tres eixes de actuación: o impulso ás vocacións STEM, a promoción de adaptación aos novos perfís dixitais e a formación de e-líderes para a transformación dixital.

Nova edición do Programa Tecnólog@ por un día

Para espertar o interese polos estudos STEM entre os máis novos abrirase en breve o prazo para inscribirse no programa Tecnólog@ por un día, que ofrece a rapaces e rapazas de ata 17 anos a oportunidade de desfrutar dunha de xornada de inmersión en proxectos reais da man dos responsables de talento e profesionais sénior das empresas colaboradoras.

Como novidade, coa volta á presencialidade desta iniciativa, os nenos e nenas participantes, que realicen a súa visita en Amtega, terán a posibilidade de visitar as instalacións como o GaiásTech, onde realizarán actividades lúdico-formativas na sala inmersiva con imaxes 360º e lentes de realidade virtual.

Webinars para profesionis e mentorización na FP

No seu esforzo por continuar fomentado os novos perfís dixitais, esta nova edición de DigiTalent lanza un ciclo de Webinars TransformaTech Sessions, que afondarán en temáticas relativas á Industria 4.0 e tecnoloxías disruptivas ligadas ao Big Data, a ciberseguridade ou a Intelixencia Artificial. As xornadas estarán orientadas a todo tipo de profesionais que desexen especializarse neses ámbitos e contarán cun servizo de titorías online.

Doutra banda, a Amtega porá en marcha o Programa de Mentoring FP, no que alumnos e alumnas de Formación Profesional do ámbito STEAM contarán coa colaboración dunha rede de mentores que resolverán as súas inquedanzas laborais, orientarán as súas iniciativas emprendedoras e acompañaranos na identificación de saídas profesionais no ámbito tecnolóxico a través de sesións personalizadas.

Retorna do talento dixital galego

A Amtega ven de lanzar en colaboración coa Secretaría Xeral de Emigración o Portal Retorna Dixital, unha iniciativa dirixida aos galegos e galegas do sector TIC que se encontran no exterior e que desexan retornar á súa terra, ofrecéndolles oportunidades para comezar unha nova carreira profesional.

O Portal, activado no mes de setembro ao abeiro do Plan DigiTalent e enmarcado na web GaliciaAberta, é un espazo que facilita o encontro entre as empresas do sector TIC galego adheridas que buscan profesionais especializados e o talento dixital emigrado de Galicia. Ademais, o Portal dispón dun directorio de empresas que os profesionais interesados poderán consultar para contactar directamente. As ofertas de emprego poden consultarse en Retorna Digital | GaliciaAberta.
As empresas do Pacto Dixital continúan ampliando o Catálogo coas súas achegas
DigiTalent foi concibido coma un Plan vivo e conectado coa realidade galega para a xeración e retención de talento, unha iniciativa aberta á reflexión conxunta entre a Administración galega e os axentes do ecosistema dixital.

Neste compromiso compartido, a estas actuacións sumaranse, un ano máis, as iniciativas lideradas polas 12 empresas adheridas ao Pacto Dixital de Galicia, que colaboran coa Amtega no seu esforzo de impulsar os eixes estratéxicos do Plan e promover entre a cidadanía as capacidades necesarias para desenvolverse plenamente no eido dixital.

Imaxes relacionadas
Data de actualización: 10/10/2021