A Xunta licita por máis de 3,8M€ as obras do saneamento de Celeiro para completar o tratamento das aguas na ría de Viveiro

O delegado territorial de Lugo, Javier Arias, subliña que o Goberno galego inviste case 8 millóns de euros nesta actuación e na ampliación da depuradora municipal, cuxa entrada en funcionamento se prevé a comezos de ano

As empresas interesadas poderán presentar as súas ofertas para a execución destas obras ata o vindeiro 20 de decembro
 

Viveiro (Lugo), 18 de novembro de 2021
Compartir
  • whatsapp

A Xunta, a través da Consellería de Infraestruturas e Mobilidade, licitou hoxe por máis de 3,8 millóns de euros as obras do saneamento de Celeiro e a mellora da condución de vertido submarino á Estación Depuradora de Augas Residuais (EDAR) de Viveiro, que está sendo ampliada para asumir o incremento de demanda procedente deste núcleo, entre outros fins.

O delegado territorial da Xunta en Lugo, Javier Arias, explicou hoxe en Celeiro esta nova actuación, que completará os traballos de saneamento da ría de Viveiro e que suporá un investimento conxunto do Goberno galego de case 8 millóns de euros.

As empresas interesadas poden presentar as súas ofertas ata o vindeiro 20 de decembro, e o prazo de execución das obras é de 12 meses. Arias indicou que consistirán na construción dun novo bombeo e dun depósito de retención, que levarán directamente as augas residuais dese núcleo cara ao novo pretratamento da depuradora.

En concreto, executarase un bombeo cun depósito de retención (tanque de tormentas) de 650 m3 de volume útil que substituirá ao actual bombeo de pretratamiento de Celeiro, e dende o que se impulsará a auga ata o novo pretratamento de Viveiro. Permitirá a laminación tanto nas puntas durante o día como nos caudais en tempo de choiva.

Así mesmo, construirase unha nova condución de desaugue submarino que se conectará ao actual tramo terrestre existente e que funcionará por gravidade a través dunha cámara de carga situada a continuación da desinfección da depuradora.

Próxima posta en marcha

Javier Arias lembrou que as obras na planta depuradora están xa moi avanzadas e prevese que poida iniciarse a posta en marcha en probas a comezos de ano; alcanzan un investimento de preto de 4 millóns de euros e ampliarán en case un 50% a súa capacidade para que poida prestar un mellor servizo ao núcleo de Viveiro e sumar ademais o de Celeiro.

Os traballos na depuradora consisten na creación dun novo pretratamento de dúas liñas, con procesos de desareado e desengrasado; a construción dunha terceira balsa do reactor biolóxico e un novo edificio para as soplantes necesarias para a reacción desas balsas e os bombeos. Tamén se leva a cabo a instalación dun novo sistema de desinfección por cloración, ademais de melloras na liña de lodos. Estas actuacións son cofinanciadas pola Unión Europea no marco do programa operativo FEDER Galicia 2014-2020.

O delegado destacou a aposta da Xunta polo saneamento da ría de Viveiro, apoiando ao Concello nas súas competencias, como tamén prevé facer nos municipios de Foz, Burela ou Barreiros.

Javier Arias subliñou a necesidade de que estas obras vaian acompañadas da adopción de medidas por parte do Concello de Viveiro para controlar as entradas de auga nas redes de saneamento de Celeiro e evitar que reciban vertidos industriais sen o debido tratamento.

Lembrou que este sistema de saneamento e depuración de Viveiro, no que a Xunta está a realizar tan importante investimento, ten o cometido de tratar as augas residuais urbanas do municipio e correspóndelle á Administración local controlar que non se introducen nese sistema achegas en condicións inadecuadas que impidan un funcionamento axeitado e eficiente das novas infraestruturas.

Incidiu na importancia socioeconómica e ambiental das rías, que sustentan actividades como a pesca, o marisqueo, a acuicultura e tamén o turismo.

Imaxes relacionadas
Data de actualización: 18/11/2021