A Xunta incrementa en máis de 65.000€ o orzamento para a financiación de servizos sociais comunitarios nos concellos da Pobra, Ribeira e Porto do Son

Estas axudas están orientadas na súa maioría á contratación de persoal así como ao financiamento do SAF básico, ao funcionamento das escolas infantís municipais e a programas socio comunitario

Os concellos da comarca do Barbanza recibiron no 2021 máis de 600.000 para financiar estes programas e no 2022 manteranse estas partidas e ademais incrementarase neses tres concellos

Ribeira (A Coruña), 28 de xaneiro de 2022
Compartir
  • whatsapp

O delegado territorial da Xunta na Coruña, Gonzalo Trenor, e o alcalde de Ribeira, Manuel Ruíz Rivas , informaron do incremento na financiación de programas e para a contratación de persoal técnico de servizos sociais comunitarios municipais no marco do Plan Concertado na comarca do Barbanza. Na práctica suporá que o concello de Ribeira contará este ano con dous traballadores sociais máis e Porto do Son con un máis, e a Pobra porá en marcha un novo programa de inclusión social. Este incremento suporá que estes tres municipios reciban máis de 65.000 euros.

O delegado da Xunta lembrou que a Xunta destinou no 2021 máis de 600.000 euros a todos os concellos do Barbanza para a contratación de persoal para o financiamento do SAF básico, para o funcionamento das escolas infantís municipais e para a posta en marcha de programas socio comunitarios. Trenor recalcou que “no 2022 manteranse esas partidas e a maiores Ribeira, Porto do Son e A Pobra se beneficiaran do incremento do Plan Concertado que ascende en toda Galicia a 3 millóns de euros”

Este incremento redundará nunha mellora nos tempos e na calidade da atención que prestan á cidadanía. Ademais, acadarase unha maior efectividade das medidas que requiren da implicación destes axentes para acadar os obxectivos de loita contra a pobreza e a exclusión social.

Nos últimos anos, os servizos sociais comunitarios dos concellos, como porta de entrada ao Sistema de Servizos Sociais, rexistraron un incremento da demanda de atención, á vez que se deu a necesidade de maior implicación do persoal para facer efectivas as medidas de loita contra a pobreza e a exclusión social impulsadas pola Consellería de Política Social. “Co obxecto de seguir ofrecendo unha atención de calidade e para garantir a efectividade das medidas postas en marcha polo departamento autonómico levarase a cabo este reforzo”, indicou o delegado da Xunta.

Plan concertado Galicia

Trenor lembrou que a Xunta concedeu aos Concellos galegos 17,2 millóns de euros en axudas para financiar os servizos sociais municipais. Estas achegas, enmarcadas dentro do Plan Concertado, irán destinadas na súa maioría á contratación de persoal e á posta en marcha de programas de atención como o Servizo de Axuda no Fogar (SAF) básico, o funcionamento das escolas infantís de titularidade municipal e a programas sociocomunitarios.

O Plan Concertado incrementouse en 3 millóns de euros con respecto ao ano anterior, é dicir, nun 20%. A maior parte da contía, 12,3 millóns de euros, irá dedicado ao cofinanciamento do persoal dos servizos sociais comunitarios de todos os Concellos de Galicia, trátase dun 12,5% máis que o ano pasado (1,3 millóns de euros). Este incremento permitirá que 25 concellos da provincia da Coruña aumenten o seu persoal.

Ademais, o Plan Concertado servirá para renovar o financiamento do Servizo de Axuda no Fogar (SAF) básico e para o funcionamento das escolas infantís municipais e a compensación pola aplicación da gratuidade. Así mesmo, este plan tamén se incrementa en preto de 300.000 euros para a posta en marcha de novos programas en 22 Concellos. Deles, cinco son da provincia da Coruña, oito na provincia de Lugo, sete en Ourense e dous en Pontevedra.

Imaxes relacionadas
Data de actualización: 28/01/2022