A Xunta destaca a pegada industrial da fábrica de fibras téxtiles na que as pemes suporán o 65% dos provedores

O vicepresidente económico e conselleiro de Economía, Empresa e Innovación en funcións, Francisco Conde, mantivo en Chantada unha reunión cos alcaldes das comarcas de Chantada e A Ulloa

Subliña que a planta contribuirá a maximizar o impacto social do proxecto, exercendo un efecto transformador na economía e nas infraestruturas locais

A Xunta e os concellos acordan colaborar para anticiparse ás necesidades que o proxecto xerará en materia urbanística, de servizos, de investimentos ou de formación

Galicia agarda que o proxecto sirva de revulsivo para adquirir un maior compromiso por parte do Goberno e así finalizar infraestruturas tan necesarias como a autovía Lugo-Santiago (A-54)
 

Chantada (Lugo), 13 de maio de 2022.-
Compartir
  • whatsapp

O vicepresidente económico e conselleiro de Economía, Empresa e Innovación en funcións, Francisco Conde, participou esta mañá en Chantada nun encontro con alcaldes das comarcas de Chantada, A Ulloa e Lugo (Carballedo, Chantada, Taboada, Antas de Ulla, Monterroso, Palas de Rei, Portomarín, Friol e Guntín), onde destacou a pegada industrial que suporá a fábrica de fibras téxtiles. Neste sentido, explicou que a previsión é que máis do 65% dos provedores sexan pemes, un dato relevante nun sector como o forestal-madeira tendo en conta que 9 de cada 10 concellos galegos teñen empresas da industria da transformación da madeira.

 

Conde subliñou que a magnitude do proxecto, que ademais vincula dous sectores estratéxicos para Galicia como o forestal e o téxtil, permitirá que o seu radio de acción chegue a toda a provincia de Lugo e a toda a Comunidade exercendo un efecto tractor e transformador na economía e infraestruturas locais. Por iso, asegurou que maximizará o impacto social, coa creación de 2500 postos de traballo entre directos e indirectos, incrementará tanto a demanda de materia prima como da industria loxística e permitirá a implantación de novas empresas.

 

Neste sentido, tal e como anunciou, a Xunta acordou cos concellos máis directamente afectados o inicio dunha colaboración para identificar e anticiparse ás necesidades que a implantación deste proxecto vai xerar en eidos como o urbanístico, os servizos, os investimentos necesarios ou a formación.

 

O vicepresidente económico en funcións explicou que vai ser fundamental ter finalizadas infraestruturas tan necesarias como a autovía Lugo-Santiago (A-54), polo que se agarda que a planta actúe como revulsivo para adquirir un maior compromiso por parte do Goberno. Ademais é necesario que o Executivo central asuma o seu compromiso con este proxecto a través dos fondos europeos Next Generation.

Imaxes relacionadas
Data de actualización: 13/05/2022