Galicia, Asturias, Cantabria e Castela e León piden á Unión Europea que escoite a súa postura sobre o lobo

O conselleiro cántabro do ramo, en representación das catro comunidades lobeiras, trasladou esta semana o problema aos comisarios europeos de Medio Ambiente e de Agricultura, propoñendo unha reunión urxente e presencial cos catro territorios

Durante o encontro, entregoulles aos responsables comunitarios unha carta conxunta na que solicitan á Comisión Europea criterios homoxéneos a nivel supranacional para equilibrar a conservación desta especie coa conservación do rural

Compartir
  • whatsapp

Santiago de Compostela, 19 de maio de 2022.- Galicia, Asturias, Cantabria e Castela e León, as catro comunidades que albergan a maior parte da poboación de lobos de toda España, trasladáronlle ás autoridades europeas a necesidade urxente de manter un encontro presencial e conxunto, nalgunha das catro autonomías ou na sede da Comisión Europea en Bruxelas, para abordar o problema do lobo xerado pola súa recente inclusión na Listaxe de especies silvestres en réxime de protección especial (Lesrpe).

 

En representación dos catro gobernos autonómicos, o conselleiro de Desenvolvemento  Rural, Gandaría, Pesca, Alimentación e Medio Ambiente, Guillermo Blanco, viaxou este xoves a Bruxelas para entregarlle aos comisarios de Medio Ambiente, Océanos e Pesca, Virginjus Sinkevicius, e de Agricultura, Janusz Wojciechowski, unha carta elaborada conxuntamente cos seus homólogos de Galicia, Asturias e Castela e León para solicitar á Unión Europea que estableza criterios homoxéneos a nivel supranacional para modular de maneira adecuada a conservación do lobo coa loita contra o despoboamento, a conservación da biodiversidade e a produción de alimentos de calidade no medio rural.

 

“Non imos darnos por rendidos con este problema”, subliñou Blanco, quen lembrou que os danos dos lobos sobre o ganado extensivo “empezan a ser insoportables xa nalgunhas zonas ao norte do río Douro”.

 

Neste sentido, presaxiou que “as mortes irán a máis, desgraciadamente”, dado o grave perigo que corren os animais de bovino, equino, ovino e caprino que iniciaron nesta época do ano a subida a pastos sen ningún tipo de protección ante as ameazas da crecente poboación de lobos e a imposibilidade de realizar os controis poboacionais desde que esta especie foi incluída o ano pasado polo Ministerio para a Transición Ecolóxica e o Reto Demográfico (Miterd) na Lesrpe.

 

“Non queremos acabar cos lobos, pero necesitamos controlar a especie para que os nosos gandeiros poidan seguir vivindo e os seus animais deixen de morrer todos os días”, indicou Blanco.

 

Por todo o exposto, o responsable cántabro considerou necesaria, en nome dos catro territorios que concentran o 95% dos exemplares desta especie de todo o país, a intermediación urxente da Unión Europea para recuperar o consenso e o diálogo que sempre caracterizaron as relacións entre as comunidades autónomas, como responsables da conservación e xestión directa da especie do lobo ibérico, e o Estado, con competencias en materia medioambiental.

 

Así mesmo, reclamou que se salvagarde o espírito de colaboración institucional na cogobernanza a todos os niveis administrativos, “buscando acordos coas entidades locais e os sectores afectados polas decisións que se tomen e que deben estar sempre baseadas nos mellores datos dispoñibles”.

 

De igual xeito, destacou a necesidade de buscar consenso e participación na toma de decisións, algo que, na súa opinión, “forma parte do núcleo da xestión eficiente dos territorios e dos valores naturais e culturais que atesoura”.

 

Neste sentido, Blanco trasladou a Sinkevicius e a Wojciechowski a preocupación dos sectores gandeiros de Galicia, Asturias, Cantabria e Castela e León ante “a situación de absoluta inseguridade xurídica que fai que os profesionais estean criando gando para que sexa alimento para outras especies”.

 
Unha medida contraria aos informes técnicos

Ademais, aproveitou a ocasión para volver a reclamar ao Goberno de España que “deixe de avasalar” ao sector gandeiro con medidas como a de sobreprotexer unha especie, o lobo, que xa contaba con protección, tanto nestas catro comunidades como en España.

 

Neste sentido, lembrou os exhaustivos informes científico-técnicos elaborados polas catro comunidades autónomas demostran que “o lobo ao norte do Douro goza dun estado de conservación favorable”, xa que tanto a avaliación da dinámica das poboacións como a área de distribución e calidade do hábitat para a especie “resulta a todas luces favorables”, o que, en opinión de Blanco, “fai incomprensible a decisión do Ministerio de incluír o lobo na Lesrpe”.

Imaxes relacionadas
Data de actualización: 19/05/2022