A Xunta inicia as obras dunha senda peonil na estrada autonómica PO-252, en Pazos de Borbén

A actuación supón un investimento autonómico próximo aos 45.000 euros

Permitirá dispor dunha zona de circulación peonil independente do tráfico rodado na marxe dereita desta vía, entre os puntos quilométricos 10+640 e 10+845

Dará continuidade ás beirarrúas da travesía da PO-252 no núcleo de Xunqueiras

A Consellería de Infraestruturas e Mobilidade continúa mellorando a rede viaria autonómica para favorecer os desprazamentos a pé de modo máis seguro e sustentable
 

Compartir
  • whatsapp

Santiago de Compostela, 23 de xuño de 2022.- A Consellería de Infraestruturas e Mobilidade comezou hoxe as obras para a execución dunha senda peonil na estrada autonómica PO-252, en Pazos de Borbén.

 

Os traballos, que suporán un investimento autonómico próximo aos 45.000 €, céntranse na construción dun itinerario peonil pola marxe dereita da PO-252, entre os puntos quilométricos 10+640 e 10+845, xa que actualmente ese treito non conta con zona de circulación peonil independente do tráfico rodado.

 

Esta actuación permitirá dar continuidade ás beirarrúas existentes na travesía da PO-252 no núcleo de Xunqueiras.

 

As obras iniciadas inclúen a execución dunha senda cun ancho mínimo de 1,8 metros, composta por unha capa de 16 centímetros de espesor de formigón cor terriza, reforzado con mallazo e bordos de formigón.

 

A elevación con respecto da calzada será de 10 centímetros. Tamén se colocará pavimento táctil de botóns no vao peonil previsto.

 

Esta intervención fai necesario realizar a escavación do terreo ata unha profundidade de 30 centímetros que, posteriormente, se encherá cunha capa do mesmo espesor. Nalgunhas zonas será preciso proceder a un retaluzado do noiro existente na marxe.

 

Tamén se executará unha canalización de drenaxe subterránea, formada por un colector de PVC, así como os correspondentes sumidoiros e pozos de rexistro que permitan a evacuación óptima da auga da plataforma e das marxes.

 

Será necesario o retranqueo de dúas luminarias e un sinal vertical, e tamén se retirará unha reixa para conseguir o ancho proxectado da senda.

 

A Xunta continúa mellorando a rede viaria autonómica para favorecer os desprazamentos a pé de modo máis seguro e sustentable.

Imaxes relacionadas
Data de actualización: 23/06/2022