A Xunta somete a información pública a aprobación inicial do proxecto de interese autonómico do parque empresarial do Corgo

A ampliación do parque ocupará 203.049 m2, dos que 118.244 m2 serán parcelas

O investimento previsto para a adquisición do solo, a urbanización e a dotación de servizos exteriores, entre outras actuacións, supera os 8,5 millóns de euros

Compartir
  • whatsapp

Santiago de Compostela, 23 de xuño de 2022 A Xunta de Galicia someterá a información pública durante o prazo dun mes a aprobación inicial do Proxecto de interese autonómico para a ampliación do parque empresarial do Corgo (Lugo), segundo publica hoxe o Diario Oficial de Galicia.

 

A ampliación do polígono do Corgo ocupará unha superficie total de 203.049 metros cadrados, dos que 118.244 metros corresponderán ás parcelas en que se divida.

 

O orzamento previsto para a ampliación do parque empresarial supera os 8,5 millóns de euros, estando previsto que este mesmo ano se adquira o solo necesario por importe de máis de 1,24 millóns. Parte deste solo xa é propiedade de Xestur.

 

A licitación das obras de urbanización está prevista para o terceiro trimestre de 2022, por un importe de máis de 3,5 millóns de euros. Ademais, será necesario destinar máis de 3 millóns de euros ao servizos exteriores do parque —subministro eléctrico, abastecemento de auga e saneamento—. O resto do investimento corresponde a traballos técnicos e outros gastos.

 

Cómpre lembrar que o concello do Corgo xa dispón dun parque empresarial promovido por Xestur, que conta con máis de 92.000 metros cadrados de parcelas, que se atopan vendidas na súa totalidade.

Data de actualización: 23/06/2022