O presidente da Xunta interveu no acto do XX aniversario da Asociación para o Progreso da Dirección (APD) no Noroeste

Rueda subliña que a Axenda Financeira de Galicia 2022 aspira a mobilizar 400 M€ para axudar a facer realidade os proxectos do tecido empresarial

Asegura que é preciso que os fondos europeos cheguen ao tecido produtivo para xerar novas oportunidades industriais. “Necesitamos que o Goberno tome a iniciativa cun reparto áxil e concreto”, di o titular do Goberno galego

Santiago de Compostela, 5 de xullo de 2022
Compartir
  • whatsapp

O presidente do Goberno galego, Alfonso Rueda, subliñou hoxe durante a inauguración do XX aniversario da APD, que a Axenda Financeira de Galicia 2022 aspira a mobilizar 400 M€ para axudar a facer realidade os proxectos do tecido empresarial. 

 

Nese sentido, recordou que é igualmente obrigado que os fondos europeos cheguen ao tecido produtivo para xerar novas oportunidades industriais, “Non podemos facelo en solitario. Necesitamos que o Goberno tome a iniciativa cun reparto áxil e concreto”, dixo, insistindo en que se necesitan certezas para que Stellantis poida competir, para que proxectos transformadores como o polo forestal de Altri en Lugo e a planta orientada de baterías de Showa Denko na Coruña sexan unha realidade, ou para que os proxectos de reindustrialización das Pontes, a nova planta de papel tisú de Ence ou o proxecto de hidróxeno renovable de Reganosa xeren novas oportunidades.

 

Ademais, en relación ao contexto económico actual, Rueda destacou que aínda que hai que actuar diante da crise de prezos agravados polo conflito de Ucraína, Galicia pode estar satisfeita do camiño percorrido ata aquí: de bater un novo récord de exportacións en 2021 e rexistrar ata abril un 23,5% máis sobre ese ano histórico, de acadar o mellor dato de paro en xuño e o terceiro mellor dato da serie histórica ou de ser a segunda Comunidade co menor endebedamento.

 

Ao longo da súa intervención, Rueda tamén recoñeceu o papel da Asociación para o Progreso da Dirección (APD) que, segundo indicou, acompañou a Galicia e a España en momentos moi distintos da súa andaina económica recente, sempre contribuíndo á prosperidade dos galegos. A este respecto, expresou que nin a economía debe ver na administración un freo ás súas aspiracións, nin a política debe compartir eses discursos que ven nos emprendedores un branco fácil para a crítica.

 

“Galicia non quere ser espectadora, senón protagonista das transformacións económicas e sociais que nos agardan nos vindeiros anos”, sinalou, remarcando que o futuro de Galicia pasa por apostar pola innovación e o talento -motivo polo que a nova RIS3 recolle o programa Persoas e Talento que contará con 220 M€- e por incorporar a máis mulleres a postos directivos. Un obxectivo, dixo, que levará á Xunta a destinar 16 M€ para mellorar a conciliación, aprobar unha Lei de igualdade e activar un Plan estratéxico de igualdade de oportunidades entre mulleres e homes 2022/2027, dotado con 935 M€.

 

Imaxes relacionadas
Data de actualización: 05/07/2022