A Xunta incorpora 15 novos centros ao programa ‘Educación responsable’ de desenvolvemento emocional, social e creativo

Na actualidade participan nesta iniciativa 71 centros de ensino, 8.766 alumnos e 735 docentes

Como novidade, o vindeiro curso haberá un novo recurso educativo ‘Playing Emotions’, relacionado coas novas tecnoloxías e a análise das técnicas narrativas
 

Santiago de Compostela, 16 de agosto de 2022
Compartir
  • whatsapp

O próximo curso un total de 15 novos centros educativos vanse incorporar ao programa Educación Responsable que ten como obxectivo o desenvolvemento da educación emocional, social e da creatividade, e que se realiza en colaboración coa Fundación Botín. Na actualidade están a traballar esta iniciativa 71 centros de ensino, 8.766 alumnos e 735 docentes, aos que se sumarán os novos seleccionados.

 

Como novidade para o curso 2022/23, a Consellería de Cultura, Educación, FP e Universidades incorpora, para os centros galegos participantes no programa, un novo recurso educativo denominado Playing Emotions, relacionado coas novas tecnoloxías e a análise das técnicas narrativas, sempre desde unha perspectiva das emocións.

 

Deste xeito, a iniciativa entronca co Plan de Nova Arquitectura Pedagóxica e coa Estratexia Educación Dixital, dado que inflúe na disposición dos espazos das escolas, propiciando ambientes confortables e inclusivos para o alumnado. Ademais, emprega ferramentas cuxo uso fomenta a competencia dixital nos procesos de ensino-aprendizaxe relacionados coa igualdade, a convivencia e a inclusión.

 

Centros de nova incorporación

CENTRO
LOCALIDADE
PROVINCIA
CEIP A Maía
Ames
A Coruña

IES Afonso X O Sabio

Cambre
A Coruña
CPI do Feal
Narón
A Coruña
IES María Casares
Oleiros
A Coruña

CEIP Plurilingüe Virxe do Carme

Burela
Lugo
IES Perdouro
Burela
Lugo

CEIP Plurilingüe Curros Enríquez

Celanova
Ourense

CIFP A Carballeira-Marcos Valcárcel

Ourense
Ourense

CEIP Rosalía de Castro

Xinzo de Limia
Ourense
CPI da Cañiza
A Cañiza
Pontevedra
CEIP de Seara
Moaña
Pontevedra

CEIP A Xunqueira nº2

Pontevedra
Pontevedra

CEIP Plurilingüe da Igrexa-Chapela

Redondela
Pontevedra

CEIP de Coutada-Beade

Vigo
Pontevedra

CEIP Plurilingüe Rosalía de Castro

Vilagarcía de Arousa
Pontevedra
Fases

O programa Educación Responsable está centrado na aplicación didáctica, dentro das áreas curriculares, dunha serie de recursos de educación emocional, social e creativa, que se realiza de forma coordinada entre todos os centros da rede de Centros Educación Responsable de Galicia. A iniciativa desenvólvese ao longo de tres cursos nos que, a maiores de levar ás aulas as actividades e materiais dos que dispoñe o programa, os centros contan con formación vencellada ao Plan de Formación Permanente do Profesorado, así como financiación para desenvolver o programa a través dos Contratos-Programa.

 

O obxectivo da fase inicial e de crecemento (1º curso) é que o equipo de cada centro participante coñeza as ferramentas didácticas propias da educación emocional e aplique as actividades do programa; mentres que na fase de expansión (2º curso) o centro participante asumirá este programa como unha liña prioritaria dentro do seu proxecto educativo, recibindo formación para o resto dos docentes e estendendo o programa a un maior número de alumnado.

 

A fase de consolidación (3º curso) ten como obxectivo que o centro utilice de forma autónoma as metodoloxías, técnicas e actividades e sexa quen de elaborar outras novas, incluíndo obxectivos propios do crecemento emocional, social e creativo do alumnado. Para iso, será necesario que a maioría dos profesores incorporen nas súas programacións de aula actividades de Educación Responsable e que se aplique a totalidade dos recursos do programa coa maior parte do alumnado.

 

Galicia incorporouse a Rede de centros de Educación Responsable no curso 2014/2015. O programa desenvólvese noutras comunidades españolas, concretamente en Cantabria, Madrid, A Rioxa, Navarra, Murcia, Castela e León, Aragón e Comunidade Valenciana, así como nos países de Uruguai, Chile e México.

Imaxes relacionadas
Data de actualización: 16/08/2022