A Xunta e a Universidade da Coruña renovan a súa colaboración no fomento da investigación e control de calidade de hidrocarburos

A secretaria xeral de Industria, Paula Uría, visitou esta mañá en Ferrol as instalacións do Laboratorio de Combustibles da UDC no CIS Tecnoloxía e Deseño

Compartir
  • whatsapp

Ferrol, 22 de novembro de 2022 A secretaria xeral de Industria, Paula Uría, visitou esta mañá en Ferrol as novas instalacións do Laboratorio de Combustibles da Universidade da Coruña (UDC) no CIS Tecnoloxía e Deseño. Tal e como explicou, a Xunta e a UDC seguirán colaborando no fomento da investigación e control de calidade dos hidrocarburos.

 

As dúas institucións acordaron prorrogar o convenio que manteñen desde 2003 durante os anos 2023 e 2024 por un importe global de 706.891,92 euros -dos que a Xunta achegará 180.000 euros ao ano-. Grazas a esta colaboración, avánzase na investigación neste eido, na formación de investigadores e permite estudar os combustibles e carburantes, os procesos de extracción, refino, ensaio, destilación e distribución para obter produtos menos contaminantes e con maior rendemento.

 

Nos dous últimos anos o laboratorio realizou un total de 1446 controis en estacións de servizo, centros de distribución e relativos a GLP, combustible marítimo, fuelóleo e contaminación microbiolóxica.

 
Con este convenio, a Xunta e a UDC suman esforzos para contribuír ao impulso do desenvolvemento científico e tecnolóxico de Galicia no eido enerxético que está directamente vinculado co crecemento da actividade económica, polo que se considera prioritario como motor do progreso da Comunidade.

Imaxes relacionadas
Data de actualización: 22/11/2022