A Xunta mellorou a eficiencia enerxética da Escola de Educación Infantil San Roque, en Viveiro, tras investir 302.000 euros

O delegado territorial de Lugo, Javier Arias, explica que o proxecto incluíu a renovación das carpinterías exteriores, a substitución dunha parte da cuberta e a instalación de luminarias LED de baixo consumo

Compartir
  • whatsapp

Viveiro (Lugo), 24 de novembro de 2022 A Consellería de Cultura, Educación, FP e Universidades vén de finalizar as obras de mellora da eficiencia enerxética da Escola de Educación Infantil San Roque, no concello de Viveiro, nas que investiu 302.380 euros.

 

O delegado territorial da Xunta en Lugo, Javier Arias, visitou hoxe o centro para comprobar o resultado da actuación, que incluíu a substitución das carpinterías exteriores por outras de aluminio con rotura de ponte térmico e vidros de dobre acristalamento, baixo emisivos, acústicos, de seguridade e con cámara de aire intermedia.

 

Arias tamén destacou o cambio dunha parte da cuberta e a renovación dos canlóns e baixantes do edificio. Ademais, no interior mudáronse as luminarias por outras tipo LED de menor consumo.

 

A intervención completouse coa instalación de falsos teitos nas aulas, a reforma de aseos e o pintado dos paramentos que se viron afectados pola colocación das novas carpinterías.

 

O delegado subliñou que estas actuacións foron financiadas con cargo a un contrato por valor total de 2,5 millóns de euros para reformar dez centros educativos da provincia de Lugo, tres deles na Mariña. Así, ademais da EEI San Roque a Xunta impulsa melloras por importe de 232.300 euros no CEIP do Vicedo e por 311.380 euros no CEIP Juan Rey de Lourenzá.

 
As obras enmárcanse dentro do Plan de Nova Arquitectura Pedagóxica de Galicia, que ten por obxecto acadar unhas infraestruturas educativas máis confortables, máis innovadoras e máis sostibles desde o punto de vista medioambiental.

Imaxes relacionadas
Data de actualización: 24/11/2022