A Xunta inicia esta semana traballos de roza e limpeza nas marxes da estrada autonómica AC-110 no concello das Somozas

Estas novas actuacións nas vías da provincia da Coruña súmanse ás que se están levando a cabo nas últimas semanas na AC-549 en Noia; na autovía AG-59 en Teo; e na vía de altas prestacións VG-1.3, no seu percorrido polos municipios de Oleiros, Cambre e Sada

Proseguirán os traballos iniciados nas últimas semanas en 9 estradas das provincias de Ourense e de Pontevedra, ao seu paso por 17 municipios

Estas accións de conservación nas vías da Xunta permitirán a roza mecánica de máis de 2.600 km lineais e actuar nunha superficie de máis de 188.500 m2 de xeito manual

Desde o ano 2018 a Xunta leva investidos 8,3 M€ nas actuacións de control da biomasa nas marxes das estradas da súa competencia, a través da encomenda á empresa pública Seaga
 

Compartir
  • whatsapp

Santiago de Compostela, 4 de novembro de 2022 A Xunta iniciará o luns novos traballos de roza e limpeza nas marxes de estrada autonómica AC-110 ao seu paso polo municipio coruñés das Somozas.

Estas novas intervencións súmanse ás que se están a levar a cabo nas últimas semanas nas estradas da provincia da Coruña AC-549, en Noia; na autovía AG-59 en Teo; e na vía de altas prestacións VG-1.3, no seu percorrido polos municipios de Oleiros, Cambre e Sada.

Tamén, proseguirán a próxima semana estas actuacións de limpeza na provincia de Ourense: na estrada OU-212 ao paso por Beariz, Avión, Leiro, Carballeda de Avia e Beade; na OU-536, no seu percorrido polos municipios de Ourense, O Pereiro de Aguiar, Esgos, Xunqueira de Espadanedo, Montederramo, Castro Caldelas e San Xoán de Rio; e na estrada OU-114, en Verín.

Ademais, continuarán as rozas iniciadas nas últimas semanas nas estradas da provincia de Pontevedra: na AG-46, CG-4.1, VG-4.6 e VG-4.5, en Moaña e Cangas; na AG-51, en Salvaterra de Miño; e na estrada PO-504, na rotonda do Vinquiño, en Sanxenxo. 

Seguridade viaria e control da biomasa

A Consellería de Infraestruturas e Mobilidade acomete estas actuacións no marco do contrato coa empresa pública Seaga, por importe de máis de 2,2 millóns de euros, para o control da biomasa das marxes das estradas de titularidade autonómica para previr lumes e reforzar a seguridade viaria. 

Estas novas accións de conservación nas vías de titularidade da Xunta permitirán, nesta nova encomenda, a roza mecánica de máis de 2.600 quilómetros lineais e actuar nunha superficie de máis de 188.500 metros cadrados de xeito manual.

Ademais, retiraranse máis de 5.600 árbores situadas no dominio público das estradas, susceptibles de provocar lumes ou de supoñer un risco de caída na calzada. Tamén se levará a cabo a reparación de 22.500 metros lineais de valado dos noiros perimetrais das estradas. 

Como novidade na encomenda de 2022, prevese a reposición de 7.500 metros de valado en vías de alta capacidade que se poida danar nos labores de despexe ou roza. A reposición realizarase con valado reforzado para aumentar a protección da estrada fronte á entrada de animais. 

Con esta nova encomenda, desde o ano 2018 lévanse investidos 8,3 M€ nas actuacións de control da biomasa nas marxes das estradas autonómicas.

 

 

Imaxes relacionadas
Data de actualización: 04/12/2022