A Xunta premia á coruñesa Fernanda Rodíguez Miguélez na especialidade de Arte Urbana do programa Xuventude Crea

En segundo lugar quedou Elvira López Rodríguez, de Ribadeo, mentres o terceiro galardón foi para Andrea Otero Vázquez, natural de Ribadavia

Compartir
  • whatsapp

Santiago de Compostela, 8 de decembro de 2022 A Xunta de Galicia deu a coñecer ás gañadoras na especialidade de Arte Urbana do programa Xuventude Crea 2022, cuxa fase final se celebrou o pasado mes de novembro en Vigo. A vencedora foi Fernanda Rodríguez Miguélez, da Coruña, pola súa creación ‘Susi de ghato’.  

En segundo lugar quedou Elvira López Rodríguez, natural de Ribadeo, cunha proposta titulada ‘Egos’. E o terceiro posto recaeu en Andrea Otero Vázquez, de Ribadavia, coa obra titulada ‘Inés e Anís’. A gañadora recibirá unha gratificación de 3000 euros; 1500 a segunda clasificada e 1000 a que quedou en terceira posición. En total, chegaron a esta fase final cinco mozos e mozas que presentaron as súas obras ao xurado.  

350 artistas e 280 obras

Máis de 4000 mozas e mozos de entre 16 e 30 anos participaron nas trece edicións que se levan celebradas do Xuventude Crea, que acumula preto de 3000 proxectos creativos e obras presentadas. Na edición deste ano 2022 concorren un total de 350 artistas con 280 obras que, de novo, contarán con apoio por parte da Xunta de Galicia para dar a coñecer as súas creacións. Todas aquelas premiadas ao longo dos últimos anos exhíbense nun museo dixital recen estreado: www.museoxuventudecrea.gal

As disciplinas que se premian nesta edición son: teatro, música, novela curta, poesía, videocreación, banda deseñada, arte urbana, moda, deseño de xoias, cociña, danza moderna, creación de videoxogos, fotografía e artes plásticas (esta última comprende as modalidades de pintura e escultura). Cómpre destacar, como novidade neste 2022, o cambio de nome de graffiti a arte urbana para dar cabida ás diferentes expresións neste ámbito, así como a inclusión da modalidade de música clásica dentro de música.

 

Imaxes relacionadas
Data de actualización: 08/12/2022