Xunta e Clúster Galego da Industria do Deporte e o Benestar seguen a traballar na procura dunha sociedade máis activa

O Goberno galego e o Clúster xa traballan nun plan de gran relevancia social baseado na comunicación e na dixitalización para aumentar de xeito sensible o número de practicantes habituais de actividade física en Galicia

Santiago de Compostela, 24 de xaneiro de 2022.-
Compartir
  • whatsapp

O secretario xeral para o Deporte, José Ramón Lete Lasa, mantivo na mañá de hoxe unha xuntanza de traballo cunha representación do Clúster Galego da Industria do Deporte e o Benestar encabezada polo seu presidente, José Amado e a xerente, a campioa olímpica, Sofía Toro. Un dos principais puntos tratados na xuntanza foron as medidas a levar a cabo para acadar plena reactivación do deporte galego. Neste sentido, administración e Clúster xa traballan nun plan de gran relevancia social baseado na comunicación e na dixitalización para aumentar de xeito sensible o número de practicantes habituais de actividade física en Galicia.

 

Ademais, ambas entidades seguiron traballando nas campañas de concienciación e sensibilización dirixidas a toda a sociedade que botarán a andar nas vindeiras datas co obxectivo de aumentar a súa práctica e se consoliden as cifras de licencias deportivas pre pandemia. Estas actuacións poderán ser financiadas cos Fondos europeos Next Generation, orientados a reparar os danos económicos e sociais causados pola pandemia.

 

O obxectivo último, segundo o secretario xeral, é conseguir a importancia que o sector deportivo merece tanto na economía como na sociedade galega para xerar uns beneficios a nivel de emprego e creación de riqueza que repercutan na mellora da saúde física e mental da poboación.


Os obxectivos fundamentais do Clúster son impulsar a posta en marcha de servizos innovadores, de calidade e sostibles; deseñar grandes proxectos sectoriais; fomentar a transferencia de coñecemento; propiciar a colaboración público-privada e a posta en marcha de instrumentos de financiamento; crear postos de traballo; fomentar a captación de investimentos; favorecer a internacionalización; proporcionar recursos, formación e asesoramento: así como fomentar hábitos saudables.

 

O deporte galego representa o 2,5% do PIB de Galicia, cun volume anual de negocio que ronda os 1.600 millóns, e que xera arredor de 12.000 postos de traballo.

Imaxes relacionadas
Data de actualización: 24/01/2023