A Xunta leva coidados gratuítos en podoloxía, audioloxía e estimulación da memoria ás persoas maiores de Rairiz de Veiga

Rairiz de Veiga, 26 de xaneiro de 2023 O director xeral de Maiores e Atención Sociosanitaria, Antón Acevedo, resaltou hoxe a aposta da Xunta polos servizos de proximidade para que todos os galegos poidan acceder a eles vivan onde vivan. Díxoo durante unha visita á unidade móbil do programa de Coidados porta a porta, que desde esta mañá e ata o vindeiro luns, día 3 (incluído), atenderá aos veciños de máis idade de Rairiz de Veiga nas inmediacións do colexio e da residencia do municipio.

Antón Acevedo, que estivo acompañado da alcaldesa do concello, Josefa Asunción Morgade, destacou o éxito que ten esta iniciativa, que permitiu que, ata o momento, arredor de 30.000 galegos de máis de 55 anos de idade recibiran atención gratuíta en podoloxia, audioloxía e estimulación da memoria, e sen necesidade de desprazarse lonxe do lugar onde residen. As persoas interesadas só teñen que pedir cita previa nos números de teléfono 622 748 283 ou 623 546 922, ou ben no correo electrónico coidadosportaaporta.politicasocial@xuntal.gal.

Esta é a segunda parada que o autobús de Coidados porta a porta fai en Rairiz de Veiga. Na primeira, que tivo lugar a finais de xuño de 2022, un total de 75 veciños recibiron coidados sociosanitarios. O programa regresará por terceira vez a esta localidade ourensá a principios do vindeiro mes de agosto.

Atención ao carón do fogar

O director xeral sinalou que o Executifo autonómico ofrecerá cada vez máis servizos ao carón dos lugares onde viven os maiores, porque iso é o que prefiren cando se lles pregunta onde queren ser atendidos.