Arranca a campaña electoral de cara á renovación de sete consellos reguladores do ámbito agroalimentario
Nos outros oito consellos reguladores convocados a eleccións, por presentarse candidaturas únicas ou pola existencia de pactos entre as candidaturas, dáse por finalizado o proceso de elección de vogais
A campaña electoral finalizará o día 17 de febreiro, o 19 serán as votacións e o día 21 a xunta electoral proclamará os vogais electos e logo producirase a constitución dos plenos
Santiago de Compostela, 3 de febreiro de 2023 Dá comezo a campaña electoral das eleccións para a renovación dos órganos de goberno dos consellos reguladores do ámbito agroalimentario galego, convocadas mediante a orde da Consellería do Medio Rural publicada no Diario Oficial de Galicia (DOG) o pasado 10 de novembro. Así, a xunta electoral proclamou ata un total de 115 candidaturas que se presentaron para os diferentes censos sectoriais dos 15 consellos reguladores chamados a eleccións. Con todo, en oito deles xa se dá por finalizado o proceso.
Así, naqueles censos nos que se presentaron candidaturas únicas ou nos que, habendo máis dunha candidatura, a totalidade das proclamadas chegaron a acordos electorais de reparto de vogalías, o proceso de eleccións dáse por rematado. Isto é o que sucedeu xa no caso dos consellos reguladores da denominación de orixe Ribeira Sacra; no da indicación xeográfica Augardentes e licores tradicionais de Galicia; nos das denominacións de orixe protexidas Arzúa-Ulloa, Queixo Tetilla e San Simón da Costa; e nos das indicacións xeográficas protexidas Pataca de Galicia, Pan de Cea e Castaña de Galicia.
Nos outros sete consellos reguladores chamados a renovar os seus órganos de goberno houbo pactos, pero non na totalidade dos censos, polo que para estes continúa o proceso electoral. Así as cousas, a partir de hoxe comeza a campaña para os consellos reguladores das denominacións de orixe vitivinícolas Monterrei, Rías Baixas, Ribeiro e Valdeorras; dos consellos reguladores das indicacións xeográficas protexidas Mel de Galicia e o de Carnes de Vacún de Galicia; así como do Consello Regulador da Agricultura Ecolóxica de Galicia (Craega).
