A Axencia de Protección da Legalidade urbanística e o concello de Barro coinciden na necesidade de prestar atención especial ás infraccións no Camiño de Santiago

A Axencia de Protección da Legalidade Urbanística (APLU) trasladoulle ao Concello de Barro a necesidade de prestar unha atención especial a este municipio desde o punto de vista da disciplina urbanística tendo en conta que polo seu territorio pasa unha das rutas do Camiño de Santiago —O Camiño Portugués—, espazos que se atopan normativamente delimitados.

No transcurso dunha reunión para analizar os resultados da colaboración que manteñen o organismo autonómico e mais o Goberno local no eido do urbanismo, o director da APLU, Jacobo Hortas, e o rexedor, Xosé Manuel Fernández, coincidiron na importancia de seguir apoiándose mutuamente e centrar as inspeccións naqueles puntos que poden resultar máis delicados, como é o caso do Camiño, que é desde hai anos, como subliñou o responsable autonómico, “unha das prioridades” de actuación para os técnicos da Axencia.

A maiores, Hortas e Fernández incidiron na necesidade de seguir colaborando para velar polo cumprimento da normativa e do planeamento urbanístico e, de feito, aproveitaron o encontro para revisar os diferentes núcleos de poboación, espazos protexidos e infraestruturas de Barro, analizando as súas particularidades urbanísticas.

Pola súa parte, o rexedor municipal interesouse polas actuacións que leva a cabo a APLU co obxectivo de divulgar e mellorar o coñecemento sobre a ordenación do territorio, o urbanismo e a preservación da paisaxe como elemento e sinal de identidade.

Neste sentido, Jacobo Hortas subliñou que os técnicos da Axencia están á disposición dos municipios galegos fin de tratar de resolver calquera dúbida ou necesidade que poida xurdir, así como para ofrecerlles formación especializada ao seu persoal.

Cómpre lembrar que o Concello de Barro se adheriu a APLU no ano 2013 e, posteriormente, no ano 2019, ampliou a delegación de competencias na Axencia para seguir a garantir un uso sostible e ordenado do territorio e velar pola disciplina urbanística na localidade.