Ferrol, 17 de marzo de 2023 A delegada territorial da Xunta en Ferrol, Martina Aneiros, asistiu esta mañá á entrega de premios do campionato provincial de centros educativos de campo a través que se levou a cabo nas instalacións do Club de Campo de Ferrol. A proba desenvólvese ao abeiro do programa Xogade (Xogos Deportivos Galegos en Idade Escolar) para o curso 2022/2023 que promove a Secretaría Xeral para o Deporte.

A representante da Xunta destacou a importancia da práctica deportiva nas categorías de base de cara a afianzar hábitos de vida saudables e trasladou as súas felicitacións non só aos gañadores das diferentes categorías (benxamín, alevín, infantil e cadete) se non ao medio millar de rapaces participantes de 70 centros educativos da provincia. Entre outros, tomaron parte alumnos dos CEIP Nicolás del Río (Cedeira), Manuel Fraga (Cariño), Ponzos (Ferrol) e Unión Mugardesa (Mugardos); os CPI As Miradas (Ares) e Virxe da Cela (Monfero) e o CPR Ayala (Narón).

O programa Xogade agrupa toda a oferta deportiva e lúdica promovida pola Administración galega (escolar e federada) co obxectivo de levar a actividade a todos os concellos e brindarlle á rapazada a posibilidade de practicar e competir cos clubs e centros educativos de toda a comunidade galega. A de campo a través é unha das 15 modalidades convocadas dentro da actividade deportiva escolar de Xogade este curso xunto ás de atletismo en pista, bádminton, baloncesto, balonmán, dúatlon, fútbol sala, multixogo 6-8, natación, orientación, patinaxe artística, tenis de mesa, voleibol, xadrez e xogando co atletismo.