A Xunta grante apoio integral ás persoas vulnerables e con escasos recurso que sofren en Galicia o impacto da crise e a suba de prezos de produtos básicos
Rueda destaca que a Administración autonómica traballa para modificar a Lei de inclusión social de Galicia co obxectivo de evitar que a burocracia derivada da adaptación da Risga ao Ingreso Mínimo Vital prexudique as familias que precisan de axudas
Lamenta a falta de coordinación do Goberno central coas CC.AA. para simplificar as tramitacións e garantir que as prestacións cheguen a quen as necesita
Avanza a posta en marcha dun novo programa de acompañamento no acceso á vivenda das persoas sen fogar para situar o ámbito residencial no centro dos procesos de inclusión social
O presidente da Xunta, Alfonso Rueda, comprometeu o apoio integral do Goberno galego ás persoas vulnerables e con escasos recursos que sofren en Galicia o impacto da crise e a suba de prezos de produtos básicos. O mandatario autonómico mantivo esta semana unha xuntanza coa directiva da Rede europea de loita contra a pobreza e a exclusión social (EAPN) en Galicia, entidade que engloba máis dun cento de organizacións non gobernamentais e colectivos de persoas vulnerables presidida por Eloína Ingerto.
